Pune News : गेल्या दोन ते तीन दिवसांपासून पावसाचा प्रभाव कमी झाला आहे. परंतु मुठा खोऱ्यातील धरणक्षेत्रात हलक्या ते मध्यम सरी कोसळत आहेत. नीरा आणि कुकडी धरण क्षेत्रात अधूनमधून तुरळक पाऊस पडत आहे. त्यामुळे मागील दीड महिन्यात नव्याने सुमारे ६०.५९ टीएमसी पाणीसाठा धरणांत दाखल झाला आहे.

मॉन्सून जवळपास सात जूनच्या दरम्यान दाखल झाल्यानंतर जिल्ह्यात कमी-अधिक पाऊस पडत आहे. काही वेळा धरणक्षेत्रात जोरदार पाऊस झाला. गुरुवारी (ता. १८) सकाळी आठ वाजेपर्यंत टेमघर धरणक्षेत्रात सर्वाधिक ५० मिलिमीटर पाऊस झाला. त्यामुळे या धरणात चोवीस तासांत ०.०३ टीएमसी पाण्याची आवक झाली आहे.

या धरणांत एक जूनपासून ते आत्तापर्यंत एकूण १.०८ टीएमसी उपयुक्त पाणी दाखल झाले आहे. तर वरसगाव धरणक्षेत्रात २२ मिमी, तर पानशेतमध्ये २१ मिमी पाऊस पडला. खडकवासला धरणक्षेत्रात तुरळक सरी बरसल्या. मुठा खोऱ्यातील धरणांत एक जूनपासून ते आतापर्यंत ११.७३ टीएमसी पाणी आले आहे.

नीरा खोऱ्यातील धरणक्षेत्रात कमी-अधिक पाऊस आहे. गुंजवणी धरणक्षेत्रात ४९ मिलिमीटर, तर नीरा देवघर ३४, भाटघर १६, पवना १४, कासारसाई, कळमोडी ११, तर वडिवळे येथे १६ मिलिमीटर पाऊस झाला. चासकमान, भामा आसखेड, आंध्रा, नाझरे, वीर या धरणक्षेत्रांत पावसाचा शिडकावा झाला आहे.

त्यामुळे या धरणक्षेत्रातील धरणांत नव्याने फारसा पाणीसाठा आलेला नाही. कुकडी खोऱ्यातील पिंपळगाव जोगे, माणिकडोह, येडगाव, वडज, डिंभे, चिल्हेवाडी, घोड या धरणक्षेत्रांत तुरळक सरी पडल्या. विसापूर, उजनी धरणक्षेत्रांत पावसाची उघडीप असून ढगाळ वातावरणाची स्थिती कायम आहे.