Jalgaon News : खानदेशात यंदा सुमारे सहा टक्के क्षेत्र नापेर आहे. अनेक शेतकऱ्यांनी जमीन सुपीकतेच्या दृष्टीने क्षेत्र नापेर ठेवले असून, त्यात पुढे केळीसह रब्बी पिकांच्या पेरणीचे नियोजन आहे. खानदेशात काळ्या कसदार जमिनीत पाण्याचा निचरा कमी होतो. पीक फेरपालट करणे अनेकदा शक्य नसते.

तसेच शेणखत व अन्य सेंद्रिय बाबींचा उपयोग होत नसल्याने जमीन सुपीकता टिकविण्यासंबंधी अडचणी येतात. या स्थितीत अनेक शेतकरी क्षेत्र नापेर ठेवतात. नापेर क्षेत्र यंदाही अनेक भागांत आहे. तापी, गिरणा, पांझरा आदी नद्यांच्या क्षेत्रात नापेर क्षेत्र आहे.

या क्षेत्रात उन्हाळ्यात पूर्वमशागत करण्यात आली. अनेकांनी केळीसाठी खोल नांगरणी केली व शेत भुसभुशीत करून त्यात पेरणी टाळली आहे. जळगाव तालुक्यासह अमळनेर, चोपडा, धुळ्यातील शिरपूर भागातही अनेकांनी क्षेत्र भुसभुशीत करून घेतले.

रब्बीसाठी तयारी

नापेर क्षेत्रात कोरडवाहू रब्बी पिके जोमात येतात. कमी खर्च लागतो, असेही शेतकऱ्यांचे म्हणणे आहे. यामुळे यंदाही नापेर क्षेत्राचा प्रघात अनेक शेतकऱ्यांनी कायम ठेवला आहे. खानदेशात १४ लाख हेक्टरवर खरिपातील पिके असतात. यंदा पेरणीची टक्केवारी चांगली आहे. मागील हंगामात जूनमध्ये पाऊस कमी होता.

जुलैत पाऊसमान बरे होते. पावसाची तूट मात्र दोन्ही महिन्यांत मागील वेळेस होती. यंदा मात्र चांगला पाऊस नाही. सरासरीपेक्षा कमी पाऊस अनेक भागांत जून व जुलैत झाला आहे. आतापर्यंत चांगले पाऊसमान नाही. अशीच स्थिती राहिल्यास रब्बीसही अडचणी येतील.

जुलैत तुरळक, मध्यम पाऊस होता. त्यात पेरणीही ९४ टक्क्यांवर गेली आहे. बाजरी व अन्य पिकांची पेरणीही झाली. कापूस, उडीद, तूर, सोयाबीन, तीळ व अन्य खरीप पिकांची पेरणी १०० टक्के पूर्ण झाली आहे.

नापेर क्षेत्रात पूर्वमशागत करणार

नापेर क्षेत्रात सप्टेंबरमध्ये पूर्वमशागत करून ऑक्टोबरच्या सुरुवातीलाच केळी, रब्बी पिकांची पेरणी होईल. या क्षेत्रातील पिके जोमात वाढतात व वेळेत पेरणी होत असल्याने पुढे वेळेत काढणी, मळणी होते. सुरुवातीच्या दरांचा लाभही मिळविता येतो, असे शेतकऱ्यांनी सांगितले. पण पुढे त्यासाठी चांगला पाऊसही हवा आहे.