Kharif Sowing : नऊ हजार हेक्टरने क्षेत्र घटले

Amaravati News : खरीप हंगामातील पेरणी आटोपली असून जिल्ह्यात यंदा सहा लाख ६७ हजार हेक्टर क्षेत्रात पेरणी झाली आहे. एकूण सरासरी क्षेत्राच्या तुलनेत ती ९७ टक्के आहे. गत खरिपाच्या तुलनेत यंदा पेरणी क्षेत्रात नऊ हजार ६०३ हेक्टरने घट आली आहे. या वर्षी मे महिन्यातच अवकाळी पावसाने जोरदार हजेरी लावली.

जूनमध्ये सुरुवातीला थोडा बरसल्यानंतर अवकाश घेतल्याने पेरण्या रखडल्या होत्या. त्या जुलैमधील पावसाने वाढल्यात. खरिपाची पेरणी आता आटोपली असून जिल्ह्यात ९७ टक्के क्षेत्रावर पेरणी झाली आहे.

जिल्ह्यात खरिपासाठी सरासरी सहा लाख ८२ हजार ९९२ हेक्टर क्षेत्र असून त्यापैकी ६ लाख ६७ हजार ५५२ हेक्टरवर पेरणी झाली आहे. यंदा गतवर्षीपेक्षा नऊ हजार ६०३ हेक्टर क्षेत्र पेरणीखाली आलेले नाही.

चौदापैकी तेरा तालुक्यांत पेरणीक्षेत्रात घट झाली असून धामणगाव रेल्वे तालुक्यात मात्र गतवर्षीच्या तुलनेत ७७० हेक्टरने पेरणीक्षेत्र वाढले आहे. पीकनिहाय पेरणीत कापूस व मक्याचे क्षेत्र वाढले असून सोयाबीन, तूर, मूग, उडीद व ज्वारीच्या क्षेत्रात घट आली आहे. मक्याच्या क्षेत्रातील वाढ लक्षणीय आहे.

तालुकानिहाय पेरणीक्षेत्र (घट)

धारणी ः ४९,७९४ ( ५१५), चिखलदरा ः २३,७६६ (८८७), अमरावती ः ५१,१२३ (५२९), भातकुली ः ४८,६३० (२१८), नांदगाव खंडेश्वर ः ६५,२०६ (३३८), चांदूररेल्वे ः ३९,९७६ (२१७), तिवसा ः ३८,२७१ (४९४),मोर्शी ः ५७,५९३ ( ११३६), वरुड ः ४३,४०९ (२०८२), दर्यापूर ः ७२०६४ (५३५), अंजनगावसुर्जी ः ४१,५२५ ( १७७७), अचलपूर ः ३८,६२५ (९६२), चांदूरबाजार ः ४१,४२५ ( ६७२), धामणगावरेल्वे ः ५६०४० (वाढ ७७०).

पीकनिहाय पेरणी हेक्टर क्षेत्र

कापूस २,४०,२६० (वाढ ३,६१३)

मका ४३,१०९ ( वाढ १७,६७४)

सोयाबीन २,४५,०९३ (घट १९,७४७)

तूर १,१७,१८६ ( घट ८१०)

मूग ७६३ ( घट ३१९)

उडीद ५५९ ( १६९)

ज्वारी ४०५६ ( २,३८२)