Buldana News : संग्रामपूर तालुक्यातील कोद्री येथे शॉर्टसर्किटमुळे पाच एकरांतील उभा गहू जळून खाक (Wheat Crop Fire) झाला.

या नुकसानीनंतर महावितरण, कृषी विभागाच्या (Agriculture Department) कर्मचाऱ्यांसह, पोलिस पाटील, ग्रामंपचायत सरपंचांच्या उपस्थितीत पंचनामाही झाला. या शेतकऱ्याला आर्थिक मदत मिळावी, अशी मागणी केली जात आहे.

कोद्री गावातील शेतकरी शिवहरी दामोदर खोंड यांच्याकडे गावातीलच धर्माळ संस्थानचे शेत ठोक्याने असते. यंदा या शेतात त्यांनी पाच एकरांमध्ये गव्हाची पेरणी केली होती. या आठवड्यात गव्हाची काढणी केली जाणार होती.

मात्र ३१ मार्चच्या सायंकाळी पातुर्डा बुद्रुक परिसरात अचानक वादळी वाऱ्याला सुरुवात झाली. कोद्री शिवारात विजेच्या तारांचे घर्षण होऊन आगीचे गोळे शेतात पडले. वाऱ्यामुळे ही आग झपाट्याने वाढत गेली.

आग विझवण्यापूर्वीच पाच एकरांतील गहू पूर्णतः खाक झाला, अशी माहिती मिळाली. खोंड यांना ही माहिती पडताच त्यांनी शेतात जाऊन पाहिले असता शेतात काहीही शिल्लक राहिले नव्हते. यामुळे सुमारे दीड ते दोन लाखांचे नुकसान झाले.

याबाबत माहिती मिळताच महावितरण, कृषी अधिकारी कार्यालय, तहसील कार्यालय, पोलिस पाटील, सरपंचाला माहिती दिली.

शनिवारी (ता. एक) अधिकाऱ्यांनी घटनास्थळी भेट दिली. वायरमन अमर पवार, कृषी सहायक प्रवीण टाकसाळे, पोलिस पाटील संजय खोंड, सरपंच पती नरेश खोंड यांच्या उपस्थितीत पंचनामा झाला. हा अहवाल वरिष्ठांकडे पाठवला जाणार आहे.