Parbhani News : महात्मा जोतीराव फुले शेतकरी कर्जमुक्ती योजना-२०१९ अंतर्गत प्रोत्साहनपर अनुदान योजनेअंतर्गत मंगळवार (ता. ३०) अखेर परभणी जिल्ह्यातील १० हजार ४६७ लाभार्थी शेतकऱ्यांच्या खात्यावर ३२ कोटी ७६ लाख रुपये एवढी रक्कम जमा करण्यात आली. या अंतर्गत अद्याप ३१ हजारांवर शेतकरी अनुदानाच्या प्रतिक्षेत आहेत.

महात्मा जोतिराव फुले शेतकरी कर्जमुक्ती योजना अंतर्गत प्रोत्साहनपर लाभासाठी २०१७-१८, २०१८-१९, २०१९-२० या तीन वर्षात घेतलेल्या कर्जापैकी दोन वर्षाच्या कर्जाची नियमित परतफेड करणाऱ्या पात्र लाभार्थी शेतकऱ्यांना जास्तीत जास्त ५० हजार रुपये पर्यत दिला जात आहे.

या तीन वर्षांपकी शेवटच्या वर्षात कर्ज घेतलेले आहे. त्या वर्षाच्या कर्जाची मुद्दल रक्कम विचारात घेतली जात आहे.या योजनेअंतर्गत परभणी जिल्ह्यातील ४१ हजार ५१२ शेतकऱ्यांची यादी पोर्टलवर अपलोड करण्यात आली आहे.

आजवर विशिष्ट क्रमांकासह ११ हजार ३३५ शेतकऱ्यांची प्रसिद्ध झाली. त्यापैकी १० हजार ९७० शेतकऱ्यांनी आधार प्रमाणिकरण करून घेतले तर ३६३ खात्याचे आधार प्रमाणिकरण अजून बाकी आहे.एकूण १६५ कर्ज खात्याबाबत तक्रारी आहेत.

जिल्हास्तरीय तक्रार निवारण समिती मार्फत १०६ तक्रारीचे निराकरण करण्यात आले अजून १२ तक्रारी प्रलंबित होत्या.तालुकास्तरावर प्राप्त ४१ पैकी ६ तक्रारी प्रलंबित आहेत.

या योजनेअंतर्गत पात्र शेतकऱ्यांना लाभ देण्याची प्रक्रिया संथ गतीने सुरु आहे. मंगळवार (ता. ३०) अखेर जिल्ह्यातील १० हजार ४६७ शेतकऱ्यांच्या खात्यावर ३२ कोटी ७६ लाख रुपयाचे अनुदान जमा झाले आहे.

या अंतर्गत अनुदानास पात्र शेतकऱ्यांची विशिष्ट क्रमांकासह यादी प्रसिद्ध करण्याची प्रक्रिया रखडत सुरु आहे. त्यामुळे पात्र शेतकऱ्यांना अनुदान मिळण्यास विलंब लागत आहे.