Akola News : यंदाच्या पावसाळ्यातील पहिला जून महिना कोरडा गेल्याने जिल्ह्यातील प्रकल्पांमधील जलसाठा वेगाने कमी होत आहे. बहुतांश प्रकल्पात महिना ते दीड महिना पुरेल इतकाच साठा असल्याचे स्पष्ट आहे.

अकोला जिल्ह्यातील दोन मोठे, तीन मध्यम व एकूण २४ लघू प्रकल्प असून हे सर्व प्रकल्प मिळून सध्या १०१. ८२ दलघमी म्हणजेच सरासरीच्या २९ टक्के जलसाठा शिल्लक आहे.

अकोला जिल्ह्यात काटेपूर्णा व वाण हे दोन मोठे प्रकल्प आहेत. महान येथील काटेपूर्णा प्रकल्पात २१.३७ दशलक्ष घनमीटर म्हणजे एकूण क्षमतेच्या २४.७५ टक्के उपयुक्त जलसाठा शिल्लक आहे. वाणमध्ये सध्या २८.६० दलघमी म्हणजे ३४.८९ टक्के साठा आहे.

याशिवाय मोर्णा मध्यम प्रकल्पात ३७.६८ टक्के, निर्गुणा २२.५३ टक्के, तर उमा प्रकल्पात ९.४३ टक्के उपयुक्त साठा शिल्लक आहे. जिल्ह्यातील एकूण २४ लघू प्रकल्पांमध्ये ३०.२ टक्के जलसाठा आहे. याशिवाय बार्शीटाकळी तालुक्यातील दगडपारवा प्रकल्पात ५८.९९, अकोट तालुक्यातील पोपटखेड प्रकल्पात ५०.४७ टक्के जलसाठा आहे.

काटेपूर्णा आणि वाण प्रकल्पांमध्ये आणखी एक महिना पुरेल एवढाच जलसाठा शिल्लक आहे. पाऊस आणखी लांबल्यास पाणीटंचाई उद्भवू शकते. जिल्ह्यात या आठवड्यात रविवारपासून रिमझिम पावसाला सुरुवात झाली होती. तीन दिवस शेतकऱ्यांच्या आशा पल्लवित करणाऱ्या पावसाने मंगळवारी सकाळनंतर विश्रांती घेतली.

जिल्ह्यात आतापर्यंत सरासरीच्या ४६.७ मि.मी. म्हणजे ३३.९ टक्केच पाऊस झाला आहे. गतवर्षी याच कालावधित सरासरीच्या तुलनेत १०३.५ मि.मी. पाऊस जिल्ह्यात पडला होता. यंदा मात्र जूनमध्ये पाऊस न झाल्याने सार्वत्रिक पेरण्यांना सुरुवातही होऊ शकलेली नाही.