Jalgaon News : खानदेशात कापसाची लागवड (Cotton Cultivation) यंदा सुमारे २० ते २२ हजार हेक्टरने कमी होणार आहे. परंतु कापूस बियाण्यांची व खतांची उपलब्धता याबाबत प्रशासन किंवा कृषी यंत्रणा कार्यवाही करीत आहेत. यंदा जळगावात सुमारे कापूस बियाण्यांच्या २७ लाख पाकिटांची गरज असणार आहे.

मागील हंगामातही २७ लाख कापूस बियाण्यांच्या पाकिटांची उपलब्धता झाली होती. परंतु त्यांचा १०० टक्के वापर झाला नव्हता. यंदाही लागवड पाच लाख ४५ हजार हेक्टरवर होऊ शकते.

मागील हंगामात (२०२२-२३) कापसाची पाच लाख ६७ हजार हेक्टरवर लागवड जळगाव जिल्ह्यात झाली होती. यंदा लागवड कमी होणार आहे. परंतु त्यात मोठी घट येणार नसल्याचे लक्षात घेऊन प्रशासनाने कार्यवाही हाती घेतली आहे.

मागील हंगामात सुमारे २७.५० लाख कापूस बियाणे पाकिटांची मागणी व तेवढीच उपलब्धता करण्यात आली होती. तर सरळ किंवा देशी वाणांच्या फक्त २५ हजार बियाणे पाकिटांचा पुरवठा झाला होता.

अधिक मागणीच्या वाणांबाबत दक्षता हवी

मागील हंगामात कृषी विभाग एचटीबीटी (हर्बीसाईड टॉलरंट बॅसिलस थुरेलेंझीस) कापूस बियाणे वाणांचा काळाबाजार रोखण्यात अपयशी ठरले होते. एक पाकिट काळ्या बाजारात तीन ते चार हजार रुपयांना शेतकऱ्यांना दिले जात होते.

जळगाव जिल्ह्यात पारोळा, अमळनेर, चोपडा, धुळ्यातील शिरपूर, नंदुरबारमधील शहादा, तळोदा भागात अवैध बियाणे पुरवठादार सक्रिय होते.

परंतु कारवाईची संख्या कमी होती. यंदाही असाच प्रकार होण्याची शक्यता आहे. त्यात प्रशासनाने जिल्ह्यात भरारी पथकांची नियुक्ती केली आहे. पण ही पथके किती कारवाई करतात, याकडे लक्ष आहे.

खानदेशात बीटी (बोलगार्ड २) प्रकारच्या कापूस बियाण्यांतही काही कंपनीच्या वाणांची मोठी मागणी असते. त्यात संबंधित कंपन्या कृत्रीम टंचाई निर्माण करून नफेखोरी सुरू करतात. ही नफेखोरी रोखण्याचे आव्हानही यंदा कृषी विभागासमोर आहे.

मागील वेळेस काही वाणांच्या पाकिटांसोबत कमी मागणी असलेल्या कापूस बियाणे पाकिटांची लिंकिंग काही कापूस बियाणे वितरकांनी जळगाव शहरात केली होती. पुढे शेतकऱ्यांची नाडवणूक यातून झाली. पण कृषी विभागाने जळगावात याबाबत कारवाई केली नाही. यंदा या सर्व बाबींवर लक्ष ठेवून कारवाईसत्र राबवावे, अशी मागणी शेतकरी करीत आहेत.

धुळ्यात १० लाख पाकिटांची मागणी

खानदेशात जळगावात कापूस बियाण्यांच्या सुमारे २७ लाख पाकिटांची आवश्यकता असेल. धुळ्यात सुमारे १० लाख आणि नंदुरबारात कापूस बियाण्यांच्या सात लाख पाकिटांची गरज असणार आहे, अशी माहिती मिळाली.