Parbhani News : पंतप्रधान पीकविमा योजनेअंतर्गत खरीप हंगाम २०२४ मध्ये काढणी पश्चात नुकसान( पोस्ट हार्वेस्टींग लॉसः पी. एच. लॉस) या जोखीमबाबीअंतर्गंत परभणी जिल्ह्यातील ९ हजार ३१७ शेतकऱ्यांना २४ कोटी १८ लाख रुपये विमा मंजूर आहे.

परंतु राज्य सरकारकडे विमा अनुदानाची रक्कम थकीत आहे. त्यामुळे पीकविमा रकमेचे वाटप प्रलंबित आहे. त्यामुळे शेतकरी तीव्र नाराजी व्यक्त करत आहेत. खरीप २०२४ मध्ये परभणी जिल्ह्यात विविध जोखीमबाबीअंतर्गंत ७ लाख ५७ हजार ८२१ शेतकऱ्यांना ४३० कोटी ८७ लाख रुपये पीकविमा मंजूर आहे.

त्यात मध्य हंगाम प्रतिकूल परिस्थिती (मिड-सिझन अॅडव्हर्सिटी) अंतर्गत २५ टक्के मर्यादेत सोयाबीन, कपाशी, तूर पिकांसाठी ६ लाख ७३ हजार शेतकऱ्यांना २९९ कोटी २३ लाख रुपये अग्रिम विमा, स्थानिक नैसर्गिक आपत्ती (लोकल नॅचरल कॅलेमिटीज -एल.सी) अंतर्गंत ५० हजार २७० शेतकऱ्यांना १०४ कोटी ७७ लाख रुपये, व्यापक प्रसारित स्थानिक आपत्ती (वाईड स्प्रेड लोकल कॅलेमिटीज) अंतर्गंत २५ हजार ३७७ शेतकऱ्यांना २ कोटी ६९ लाख रुपये, काढणी पश्चात नुकसान (पोस्ट हार्वेस्टिग ःपी.एच.) अंतर्गंत ९ हजार ३१७ शेतकऱ्यांना २४ कोटी १८ लाख रुपये मिळून एकूण ४३० कोटी ८७ लाख रुपये पीकविमा मंजूर आहे.

इतर जोखीम बाबी अंतर्गंत विम्याचे वाटप झाले आहे. परंतु राज्य शासनाकडे विमा हप्ता अनुदान थकीत असल्यामुळे काढणी पश्चात नुकसान अंतर्गंत पिकविमा वाटप प्रलंबित आहे.

खरीप २०२४ मधील काढणी पश्चात नुकसान पिकविमा स्थिती

तालुका पात्र शेतकरी संख्या मंजूर रक्कम

परभणी १३१३ ४ कोटी १९ लाख रुपये

जिंतूर १५४ ३० लाख रुपये

सेलू ६४६ २ कोटी ८ लाख रुपये

मानवत २५९१ ५ कोटी ८७ लाख रुपये

पाथरी ९२७ २ कोटी २५ लाख रुपये

सोनपेठ २२ ९ लाख रुपये

गंगाखेड १३१४ ३ कोटी ९ लाख रुपये

पालम २१४६ ५ कोटी ७० लाख रुपये

पूर्णा २०४ ६१ लाख रुपये