Jalgaon News : जैन हिल्स परिसरात लागवड केलेल्या आंब्यांपैकी तब्बल १५० जातींच्या आंब्यांचे ‘मॅंगो फिस्टा’ हे प्रदर्शन नुकतेच (ता. २१) शिरसोली रोडवरील गौराई ग्रामोद्योगच्या भव्य दालनात भरवण्यात आले होते.

जैन इरिगेशन सिस्टीम्स लि. कंपनीचे अध्यक्ष अशोक जैन यांच्या हस्ते प्रदर्शनाचे उद्‍घाटन झाले. या प्रसंगी जैन इरिगेशनचे सहव्यवस्थापकीय संचालक अजित व अतुल जैन, अनुभूती निवासी शाळेच्या संचालिका निशा जैन, शोभना जैन,

डॉ. भावना जैन, जैन फार्मफ्रेश फूड्स लि.चे संचालक अथांग जैन, अंबिका जैन, अभंग जैन, आत्मन जैन, आंतरराष्ट्रीय पातळीचे आंबातज्ज्ञ डॉ. रामचंद्र गुंजाटे, डॉ. सुधीर भोंगळे, डॉ. अनिल ढाके, डॉ. बीके, डॉ. अनिल पाटील, अजय काळे, नितीन पाटील, शंकर गाडेकर उपस्थित होते.

या प्रदर्शनात भारतासह विदेशातील १५० हून अधिक नामांकित प्रजातीच्या आंबाच्या जाती मांडण्यात आल्या.

जैन इरिगेशनद्वारा विकसित केलेल्या टिश्यूकल्चरच्या प्रजाती, जैन संकरित (हायब्रीड) आंब्याच्या ३४ प्रजाती आणि थायलँड, मेस्किको, युरोप, युएसए, ऑस्ट्रलिया, इस्राईल या विदेशी आंब्यांच्या वेगवेगळ्या जातींचे आंबे एकाच छताखाली पाहायला मिळाले.