Sugarcane Season Sindhudurag News : जिल्ह्यात आतापर्यंत ४१ हजार टन उसाची तोडणी (Sugarcane Harvesting) पूर्ण झाली असून अद्याप १५ हजार टन ऊसतोडणी शिल्लक आहे. जिल्ह्यात १०५ तोडणी गट कार्यरत आहेत. ५ मार्चपर्यंत तोडणी पूर्ण करण्याचा कारखाना प्रशासनाचा मानस आहे.

जिल्ह्यातील बहुतांश ऊस असळज (ता. गगनबावडा, जि. कोल्हापूर) येथील डॉ. डी. वाय. पाटील साखर कारखान्याला जातो. या उसाची वाहतूक करूळ घाटमार्गे केली जाते.

परंतु हा घाटमार्ग अवजड वाहतुकीस धोकादायक असल्यामुळे यावर्षीदेखील जिल्ह्यातील ऊसतोडणीला विलंबाने सुरुवात झाली.

२० ऑक्टोबरला यावर्षीच्या गाळप हंगामाला (Sugarcane Crushing Season) सुरुवात झाली. त्यानंतर तब्बल दोन महिन्यांत जिल्ह्यातील अवघ्या ४ हजार टन उसाची तोडणी झाली होती. तीन ते चार तोडणी गट कार्यरत होते. परंतु गेल्या दीड महिन्यापासून कारखान्याने तोडणी गटांची संख्या वाढविली.

आतापर्यंत जिल्ह्यातील ४१ हजार टन उसाची तोडणी करण्यात आली आहे. वैभववाडी, कणकवली, कुडाळ आणि मालवण या चार तालुक्यांतील १५ हजार टन उसाची तोडणी शिल्लक आहे.

यासंदर्भात कारखान्याचे पर्यवेक्षक बी. जी. शेळके यांनी सांगितले, की सुरुवातीला धिम्यागतीने ऊसतोडणी सुरू होती. परंतु आता गती वाढविली असून १०५ तोडणी गट काम करीत आहेत. कोणत्याही परिस्थितीत ५ मार्चपूर्वी तोडणी पूर्ण करणार आहे.