Satara News : कृष्णा कारखान्यात गाळपासाठी अत्याधुनिक मशीनरी बसविण्यात आली आहे. त्यामुळे यंदाच्या हंगामात कमीत कमी वेळेत जास्तीत जास्त गाळप शक्य होणार आहे. या हंगामात १५ लाख टन गाळपाचे उद्दिष्ट ठेवण्यात आले आहे, असे प्रतिपादन य. मो. कृष्णा सहकारी साखर कारखान्याचे अध्यक्ष डॉ. सुरेश भोसले यांनी केले आहे.

रेठरे (ता. कऱ्हाड) येथील कृष्णा कारखान्याच्या ६५ व्या गळीत हंगामाचा प्रारंभ डॉ. सुरेश भोसले आणि उत्तरा भोसले यांच्या हस्ते गव्हाणीत मोळी टाकून ६५ व्या गळीत हंगामाचा प्रारंभ करण्यात आला. या वेळी कृष्णा सहकारी बँकेचे अध्यक्ष डॉ. अतुल भोसले यांची प्रमुख उपस्थिती होती.

या वेळी उपाध्यक्ष जगदीश जगताप, संचालक धोंडिराम जाधव, निवासराव थोरात, बाबासो शिंदे, बाजीराव निकम, शिवाजी पाटील, दत्तात्रय देसाई, जे. डी. मोरे, विलास भंडारे, वसंतराव शिंदे, अविनाश खरात, श्रीरंग देसाई, दीपक पाटील, कार्यकारी संचालक महावीर घोडके, मनोज पाटील, वैभव जाखले यांची प्रमुख उपस्थिती होती.

डॉ. अतुल भोसले म्हणाले, निवडणुकीच्या निमित्ताने केंद्रीय सहकार मंत्री अमित शाह कऱ्हाडला आले असता, त्यांच्याकडे सहकारी उपसा जलसिंचन योजनांना सहकार्य करण्याची मागणी केली होती. या बाबत त्यांनी सकारात्मकता दर्शविली असून, कारखान्याच्या संचालक मंडळाने प्रस्ताव दिल्यास केंद्र सरकारच्या माध्यमातून कृष्णा कारखाना संलग्नित सहकारी तत्त्वावरील उपसा जलसिंचन योजनांना मदत मिळू शकेल.

कारखान्याचे चांगल्या पद्धतीने आधुनिकीकरण झाल्याने, यंदाचा हंगाम यशस्वीपणे पार पडेल. प्रारंभी संचालक जे. डी. मोरे व त्यांच्या पत्नी सुमित्रा मोरे यांच्या हस्ते विधीवत पूजा करण्यात आली. या वेळी कारखान्याचे सभासद, बिगर सभासद, ऊस उत्पादक शेतकरी, ऊस वाहतूकदार, कंत्राटदार, व्यापारी, कारखाना अधिकारी, कर्मचारी यांची मोठी उपस्थिती होती.