Solapur News : सोलापूर जिल्ह्यात गेल्या आठवड्यात पावसाने जोरदार हजेरी लावली. त्यामध्ये खरिपातील पिकांचे मोठे नुकसान झाले, या नुकसानीच्या जवळपास १२ हजार तक्रारी शेतकऱ्यांनी पीकविमा कंपन्यांकडे केल्या असून, त्यापैकी जवळपास ७ हजार तक्रारींची पडताळणी विमा कंपनीने केली आहे.

सोलापूर जिल्ह्यात मागच्या आठवड्यात सलगपणे ३१ ऑगस्ट, १ आणि २ सप्टेंबर असे तीन दिवस पावसाने जोरदार हजेरी लावली. या पावसाने जिल्ह्याची वार्षिक सरासरी ओलांडली. जिल्ह्याची वार्षिक सरासरी ४८१.१ मिलिमीटर आहे.

पण प्रत्यक्षात ५१६.६ मिलिलिटर एवढा पाऊस झाला. या पावसाने खरिपातील मूग, उडीद आणि सोयाबीनचे नुकसान झाले. अनेक ठिकाणी मूग आणि उडदाच्या काढणी सुरू आहेत. पण या पावसामुळे त्यात व्यत्यय आणलाच. पण पिकांचेही मोठ्या प्रमाणात नुकसान झाले.

अनेक ठिकाणी उडीद आणि मूग शिवारात काढून टाकला होता, तो भिजून गेला, तर काही ठिकाणी शेतात पाणी साठल्याने पिके पिवळी पडू लागली आहेत. दरम्यान, या नुकसानीनंतर कृषी विभागाने तातडीने पंचनाम्याचे काम सुरू केले आहे.

तसेच पीकविम्यात सहभाग घेतलेल्या शेतकऱ्यांना ७२ तासांच्या आत संबंधित पीकविमा कंपनीला नुकसानीची पूर्वसूचना द्यावी लागणार आहे. त्यानुसार जिल्ह्यातील १२ हजार शेतकऱ्यांनी विमा कंपनीला तक्रारी दिल्या आहेत. त्यापैकी जवळपास ७ हजार तक्रारींची पडताळणी विमा कंपनीकडून कऱण्यात आली आहे. आता पुढील कार्यवाही कधी आणि कशी होणार, याकडे शेतकऱ्यांचे लक्ष आहे.