अकोला ः अकोला कृषी उत्पन्न बाजार समितीत सोयाबीनच्या दरात काहीशी वाढ झाली आहे. सोयाबीनचा कमीत कमी दर ३२०० ते जास्तीत जास्त ३५६५ असा मिळत आहे. गेल्या काही दिवसांत हे दर सुधारले असून, ही वाढ आणखी काही दिवस टिकण्याची शक्यता असल्याचे व्यापारी सूत्रांनी सांगितले. सोयाबीनची आवक दोन हजार क्विंटलपेक्षा अधिक होत आहे.

अकोला बाजारात सोयाबीनची आवक गेल्या काही काळापासून स्थिर आहे. मंगळवारी (ता. १५) येथील बाजारात २३४० क्विंटल आवक झाली होती. तुरीची ४३०० ते ५३५० रुपये क्विंटल दराने विक्री झाली. नवीन तुरीची आवक सुरू झाली आहे. दर दिवसाला तूर वाढत आहे. मंगळवारी १९६० क्विंटल आवक झाली होती.

बाजार समितीत मूग, उडदाची आवक कमी होत चालली आहे. उडदाची १९० क्विंटल आवक झाली होती. उडदाचा दर ४२०० ते ४९०० दरम्यान तर मुगाचा दर कमीत कमी ४५०० व जास्तीत जास्त ५८०० होता. हरभऱ्याची अावक सुरू झाली आहे. हरभरा ४००० ते ५००० असा होता. सरासरी ४५०० रुपये दर भेटला. संक्रांतीमुळे तीळ ९१०० ते १२००० रुपये मिळाला. आवक मात्र २ क्विंटल होती.