सोलापूर ः  सोलापूर कृषी उत्पन्न बाजार समितीच्या आवारात गतसप्ताहात कोथिंबिर, मेथी, शेपू या भाज्यांना चांगला उठाव मिळाला. त्यांचे दरही तेजीत राहिल्याचे बाजार समितीच्या सूत्रांकडून सांगण्यात आले. 

बाजार समितीच्या आवारात गतसप्ताहात भाज्यांची आवक  रोज प्रत्येकी ८ ते १० हजार पेंढ्यांपर्यत राहिली. भाज्यांची सगळी आवक स्थानिक भागातून झाली. संपूर्ण सप्ताहभर भाज्यांना मागणी राहिली. पण, त्या तुलनेत भाज्यांची आवक नसल्याने दर तेजीत राहिले. त्यातही कोथिंबिर, मेथीला सर्वाधिक उठाव राहिला.

कोथिंबिरीला शंभरपेंढ्यासाठी ८०० ते १२०० रुपये आणि मेथीला ७०० ते १००० रुपये, तर शेपूला  ५०० ते ८०० रुपये असा दर मिळाला. त्याशिवाय या सप्ताहात पुन्हा गवार, भेंडी, टोमॅटो आणि वांग्यांच्या दरातील तेजी कायम राहिली. त्यात गवार आणि भेंडीची आवक रोज  १० ते १५ क्विंटलपर्यंत राहिली. तर, वांगी आणि टोमॅटोची आवक मात्र १०० ते २०० क्विंटलपर्यंत राहिली. 

सोलापूरसह उस्मानाबाद आणि लातूर भागातूनही त्यांची आवक झाली. वांग्यांना प्रतिक्विंटलला किमान  १००० रुपये, सरासरी  २००० रुपये आणि सर्वाधिक २५०० रुपये, टोमॅटोला किमान १००० रुपये, सरासरी २००० रुपये आणि सर्वाधिक ३००० रुपये, गवारीला किमान १००० रुपये, सरासरी २२०० रुपये आणि सर्वाधिक ४००० रुपये, तर भेंडीला किमान १००० रुपये, सरासरी २००० रुपये आणि सर्वाधिक २५०० रुपये असा दर मिळाला. 

कांद्याचे दर स्थिर

कांद्याचे लिलाव अद्यापही आठवड्यातून दोनदाच सोमवार आणि गुरुवारी होत आहेत. कांद्याची स्थानिक भागातील आवक कमी आहे. बहुतांश आवक बाहेरील जिल्ह्यातून आहे. या दोन्ही दिवशी कांद्याची साधारण ५० ते १०० गाड्यापर्यंत आवक होते आहे. दर मात्र स्थिर आहेत. कांद्याला प्रतिक्विंटलला किमान १०० रुपये, सरासरी ४०० रुपये आणि सर्वाधिक ११०० रुपये असा दर मिळाला.