सोलापूर ः सोलापूर कृषी उत्पन्न बाजार समितीच्या आवारात गतसप्ताहात हिरवी मिरची, गवार, भेंडीची आवक आणि दर दोन्ही पुन्हा टिकून राहिल्याचे बाजार समितीच्या सूत्रांकडून सांगण्यात आले. कांद्याचे दर मात्र पुन्हा एकदा वधारले.

बाजार समितीच्या आवारात गत सप्ताहात हिरव्या मिरचीची रोज ३० ते ४० क्विंटल, गवारची रोज ५ ते १० क्विंटल आणि भेंडीची २० ते ४० क्विंटलपर्यंत आवक राहिली, ही सगळी आवक स्थानिक भागातूनच झाली. पण मागणी कायम असल्याने त्यांचे दर टिकून राहिले. हिरव्या मिरचीला प्रतिक्विंटलला किमान ७०० रुपये, सरासरी १००० रुपये, सर्वाधिक २५०० रुपये, गवारला किमान २००० रुपये, सरासरी ३००० रुपये आणि सर्वाधिक ४००० रुपये, तर भेंडीला किमान १००० रुपये, सरासरी २००० रुपये आणि सर्वाधिक ३००० रुपये आणि सदर मिळाला. 

या आधीच्या सप्ताहाच्या तुलनेत दरातील किरकोळ चढ-उतार वगळता दरातील तेजी टिकून राहिली. त्याशिवाय कांद्याच्या दरात या सप्ताहात पुन्हा तेजी राहिली. कांद्याची आवकही तशी १० ते २० गाड्या जेमतेम होती. कांद्याची आवक मात्र बाहेरून झाली. कांद्याला प्रतिक्विंटलला किमान ३०० रुपये, सरासरी १५०० रुपये आणि सर्वाधिक २५०० रुपये असा दर मिळाला. या सप्ताहात त्याच्या दरात जवळपास ५०० रुपयांच्या फरकाने वाढ झाली. कांद्याची आवक मागणीच्या तुलनेत सध्या कमीच आहे. पण मागणीतील सातत्य आणि आवकेतील घट कायम राहिली. तर कांद्याच्या दरात आणखी वाढ होण्याची शक्‍यता आहे. 

ढोबळी मिरची, वांगी यांचे दर मात्र पुन्हा स्थिर राहिले. ढोबळी मिरचीला प्रतिक्विंटलला किमान ५०० रुपये, सरासरी ८०० रुपये आणि सर्वाधिक १८०० रुपये आणि वांग्याला किमान १५०० रुपये, सरासरी ३००० रुपये आणि सर्वाधिक ६००० रुपये असा दर मिळाला. त्याशिवाय घेवडा आणि काकडीलाही बऱ्यापैकी उठाव मिळाला. घेवड्याला प्रतिक्विंटलला किमान २००० रुपये, सरासरी ३२०० रुपये आणि सर्वाधिक ४५०० रुपये तर काकडीला किमान ७०० रुपये, सरासरी १३०० रुपये आणि सर्वाधिक २००० रुपये असा दर मिळाला.