सोलापूर: सोलापूर कृषी उत्पन्न बाजार समितीत सोमवारी (ता. २५) कांद्याच्या भावाने आणखी उसळी घेतली. गेल्या आठवड्यात नऊ हजारांवर गेलेला कांदा सोमवारी थेट ११ हजार रुपयांवर पोचला. बाजार समितीत यंदाच्या हंगामातील हा सर्वाधिक दर आहे. 

सोमवारी बाजार समितीमध्ये २० हजार २५६ क्विंटल म्हणजे जवळपास २०५ ट्रक कांद्याच्या गाड्यांची आवक झाली. या आधी बाजार समितीमध्ये २१ नोव्हेंबरला आठ हजार आणि त्याच्या दुसऱ्याच दिवशी २२ नोव्हेंबरला नऊ हजार, २३ नोव्हेंबरला नऊ हजार ६०० रुपयांपर्यंत कांद्याचा भाव गेला होता. रविवारी बाजाराला सुटी होती. त्यामुळे आज पुन्हा सलग चौथ्या दिवशी कांद्याच्या भावाने उच्चांक करत ११ हजारांचा टप्पा पार केला. सोलापूर बाजार समितीमध्ये यंदा सर्वाधिक १८० ट्रक गाड्यांची आवक झाली होती. आज त्यामध्येही वाढ होऊन गाड्यांची संख्या २०५ वर गेली आहे. यापूर्वी तीन हजार २०० रुपयांचा असलेला सरासरी दरही आता तीन हजार ८०० रुपयांवर पोचला आहे, असे असले तरी कांद्याची ही आवक स्थानिक भागातून कमीच आहे. सध्याची आवक प्रामुख्याने बाहेरील जिल्ह्यातून आहे. गेल्या वर्षी नोव्हेंबरमध्ये कांदा ५०० ते ७०० रुपये क्विंटल दराने खरेदी होत होता. यंदा मात्र चित्र काहीसे बदलल्याचे दिसते.