शहरटाकळी, जि. नगर : ऑक्टोबर महिन्यात परतीचा पाऊस (Rain) कोसळल्याने रब्बी हंगामात (Rabi season) मुबलक पाणी उपलब्ध झाले. यंदा शहरटाकळी, दहिगाव-ने परिसरात गव्हाचा पेरा वाढणार आहे. शेतकरी खरिपाच्या काढणीनंतर रोटा मारून रब्बी हंगामासाठी शेत तयार करून गव्हाची पेरणी (Sowing wheat) करत आहेत.

खरीप हंगामात सर्वाधिक क्षेत्रावर सोयाबीननंतर कापसाची लागवड शेतकऱ्यांनी केली. परतीच्या पावसाने सोयाबीनची काढणी सुरू असताना धुमाकूळ घातला. परिणामी सोयाबीन पिकाचे अतोनात नुकसान झाले. पावसामुळे मुबलक प्रमाणात पाणी उपलब्ध असल्याने रब्बीत गहू, हरभरा आणि कांदा लागवडीला शेतकरी पसंती देत आहेत.

गहू व कांद्याचे क्षेत्र सर्वाधिक असणार आहे. खरीप हंगामात शेतकऱ्यांच्या हातात काही पडले नाही. नैसर्गिक आपत्ती, रोगराईमुळे मोठे नुकसान झाले. आता शेतकऱ्यांची उत्पन्नाची संपूर्ण भिस्त रब्बी हंगामावर अवलंबून आहे, असे देवटाकळी येथील शेतकरी संदीप खरड यांनी सांगितले.

शेतकऱ्यांना रब्बी हंगामात गहू, हरभरा, कांदा, मका आदी पिकांना शेतकऱ्यांना पाण्याची मात्रा देण्यासाठी दिवसा वीजपुरवठा करण्यात यावा. रात्री-अपरात्री वीजपुरवठा होत असल्याने गैरसोय होत आहे.

- तुकाराम घोडखिंडे, शेतकरी, मठाची वाडी