Pune News : गेले आठ ते दहा दिवसांपासून जिल्ह्याच्या पश्‍चिम पट्ट्यात मुसळधार पाऊस पडत आहे. पूर्व भागात अजूनही जोरदार पाऊस पडलेला नाही. त्यामुळे अजूनही या भागात पावसाची प्रतीक्षा आहे.

खरीप हंगाम अडचणीत आला आहे. अनेक ठिकाणी पेरण्या खोळंबल्याची स्थिती आहे. पेरण्या झालेल्या ठिकाणी पिके पावसाअभावी सुकत आहेत. त्याचबरोबर पाऊस नसल्याने भूजलपातळी खाल्यावल्याने विहिरी कोरड्या पडू लागल्या आहेत.

पावसाळ्याचे जवळपास दोन महिने पूर्ण होत आले आहेत. या काळात पूर्व भागात एक ते दोन वेळा तुरळक सरी पडल्या. परंतु काही ठिकाणी मध्यम पाऊस पडला. त्यामुळे इंदापूर, दौंड, शिरूर भागांत काही ठिकाणी पेरण्या झाल्या.

त्यानंतर पावसाने उघडीप दिल्याने पिके सुकू लागली आहेत. दौंड तालुक्यात पावसाने अपेक्षित हजेरी लावली नाही. तालुक्यातील गावतलाव अद्यापही कोरडेच आहेत. पाणीटंचाईची समस्या जाणवत आहे.

पुरंदर, बारामतीत पेरण्या खोळंबल्या

जिल्ह्यात अनेक ठिकाणी चांगला पाऊस झाला आहे. दौंड तालुक्यात काही भागांत पावसाच्या केवळ हलक्या सरी पडल्या आहेत. कुसेगाव, रोटी, वासुंदे, जिरेगाव, हिंगणीगाडा या भागातील तलाव कोरडेच आहेत.

विहिरीमधील पाणी पातळीही खालावली आहे. उसाची लागवड तसेच बाजरीसह इतर पिके धोक्यात आली आहेत. मोठ्या पावसाच्या प्रतीक्षेत बळीराजा आहे. पुरंदरच्या पूर्व भाग आणि बारामतीच्या पश्‍चिम भागात पाऊस नसल्याने अजूनही पेरण्या खोळंबल्या आहेत.

एक जून ते २५ जुलैदरम्यान पूर्व भागातील मंडलनिहाय पाऊस (मिलिमीटर) ः

शिरूर तालुका ः टाकळी ६८, वडगाव ९१.६, न्हावरा ८३.७, मलठण ३९.८, तळेगाव ७२, रांजणगाव ५१.६, कोरेगाव ७०.२, पाबळ ८५.५, शिरूर १०७.२

बारामती तालुका ः बारामती ५७.९, माळेगाव २६, पणदरे ३९, वडगाव ६०, लोणी ७४.६, सुपा ५५, मोरगाव ३७.५, उंडवडी ९१.४

इंदापूर तालुका ः भिगवण ६५, इंदापूर १५६.४, लोणी १३३.७, बावडा ४५.६, काटी ८८.२, निमगाव ३३.१, अंथुर्णी ६३, सणसर ३७.३

दौंड तालुका ः देऊळगाव ७९.७, पाटस ९८.९, यवत ३४.६, कडेगाव ६०.८, राहू ९८.३, वरवंड ८५.२, रावणगाव ७७.२, दौंड ८२.९

पुरंदर ः सासवड ११२.७, भिवंडी ७४.९, कुंभारवळण ११६.९, जेजुरी ८४.२, परिंचे ९४.७, राजेवाडी ३५.८, वाल्हा ११०.