नगर ः निघोज (ता. पारनेर) येथे महावितरणच्या (Mahavitaran) दोन कर्मचाऱ्यांना नगरच्या लाचलुचपत प्रतिबंधक विभागाने बुधवारी (ता. ९) दोन हजार आठशे रुपयांची लाच घेताना पकडले. (Arrest In Bribe) तक्रारादाराच्या घरातील मीटर नादुरुस्त झाले होते. ते त्यांनी बदलून नवीन मीटर जोडणीची मागणी केली होती. त्यासाठी महावितरणच्या कर्मचाऱ्यांनी तीन हजारांची लाच मागितली होती. शेवटी त्यांना दोन हजार आठशे रुपयांची लाच घेताना रंगेहात पकडले.

निघोज येथील तक्रारदार यांच्या घरातील विजेचे मीटर नादुरुस्त झाले होते. ते त्यांनी बदलून मागितले होते. त्यासाठी आरोपी किशोर बाळासाहेब कळकुटे (वय २३) यांनी तीन हजार रुपयांची मागणी केली होती. ती रक्कम त्यांनी विकास अशोक वायदंडे (वय ३०) यांच्याकडे देण्यास सांगितले.

वायदंडे यांनी ती रक्कम लाच म्हणून घेताना लाचलुचपत विभागाने पंचांसमक्ष रंगेहाथ पकडले. तक्रारदाराने निघोज येथील लोकजागृती सामाजिक संस्थेला या बाबत माहिती दिली होती. त्यानंतर लोकजागृतीच्या सदस्यांनी तक्रारदाराला नगर लाचलुचपत प्रतिबंधक विभागाकडे तक्रार करण्यास सांगून मदत केली. त्यानंतर निघोज येथे सापळा लावत आरोपींना शिताफीने लाच घेताना रंगेहाथ पकडले.

ही कारवाई लाचलुचपत प्रतिबंधक विभागाचे पोलिस अधीक्षक हरीश खेडकर यांच्या मार्गदर्शनाखाली पोलिस निरीक्षक शरद गोर्डे, सहायक सापळा अधिकारी गहिनीनाथ गमे यांच्या नेतृत्वाखाली हवालदार रमेश चौधरी, वैभव पांढरे, बाबासाहेब कराड, सचिन सुद्रुक, हरून शेख यांच्या पथकाने केली.