Latur News : राज्यात दररोज तीन शेतकऱ्यांच्या आत्महत्या होत आहेत. आत्महत्याचे सत्र सुरुच आहे. मराठवाड्यातील खरीप हंगाम शेतकऱ्यांच्या हातून गेला आहे. शेतकरी संकटात आहे. पण सत्ता संघर्षात या प्रश्नांकडे लक्ष द्यायला शासनाला वेळ नाही.

शासनाने शासन आपल्या दारी हा उपक्रम बंद करुन या प्रश्नांकडे गांभिर्याने लक्ष द्यावे या करिता २६ जुलै रोजी शेतकऱ्याच्या तरुण मुलासह मुंबईत ‘शेतकरी शासनाच्या दारी’ जाणार आहोत, अशी माहिती शेतकरी नेते विनायकराव पाटील यांनी गुरुवारी येथे पत्रकार परिषदेत दिली.

या वर्षी मृग, आद्रा व पुनर्वसु हे तिन्हीही नक्षत्र कोरडे गेले. पेरणीयोग्य पाऊस न झाल्यामुळे राज्यात अनेक विभागात पेरणी झाली नाही. मराठवाड्याची अवस्था फार बिकट आहे. या वर्षी खरिपाचा सिजन पूर्णपणे धोक्यात आला आहे. त्यामुळे शेतकऱ्याची अवस्था फार चिंताजनक झाली आहे. तसेच कोणत्याच शेतीमालाला भाव नाही. सर्वात गंभीर बाब म्हणजे मागील वर्षभरामध्ये राज्यात ३ हजार पेक्षा जास्त शेतकऱ्यांनी आत्महत्या केल्या आहेत.

कृषी मूल्य आयोगाने सोयाबीनचा उत्पादन खर्च प्रतिक्विंटला सहा हजार ७७६ रुपये काढला आहे तर केंद्राचा हमी भाव चार हजार सहाशे रुपये आहे. कापसाचा उत्पादन खर्च आठ हजार ९६८ रुपये प्रतिक्विंटल आहे. तर हमी भाव सात हजार २० रुपये आहे.

धानाचा उत्पादन खर्च चार हजार ५३४ रुपये प्रतिक्विंटलला आहे तर हमी भाव दोन हजार २०३ रुपये आहे. उसाचा प्रति टन खर्च चार हजार तीन रुपये आहे तर हमीभाव तीन हजार १० रुपये आहे. म्हणजेच एक ते अडीच हजार रुपयांपर्यंत प्रति क्विंटलला तफावत असताना दिसत आहे. पण याकडे शासनाला लक्ष द्यायला वेळ नाही, असे पाटील म्हणाले.

शासनाला धोंडे जेवण

शेतकऱ्यांच्या प्रश्नांकडे लक्ष द्यावे म्हणून अधिक मासानिमित्त २६ जुलै रोजीच मंत्रालयाशेजारी गांधी पुतळ्यासमोर शासनासाठी धोंडे जेवणाचे वतन देण्यात आले आहे. याच्या पत्रिकाही वाटप करण्यात आल्या आहेत. आत्महत्याग्रस्त शेतकरी कुटुंबीयाच्या वतीने हे धोंडे जेवण शासनाला दिले जाणार आहे, अशी माहिती पाटील यांनी या वेळी दिली.