जालना / औरंगाबाद : दोन्ही जिल्ह्यांतील द्राक्ष पट्ट्यातील द्राक्ष हंगामाचे (Grape Season) गणित येत्या काळातील वातावरणावर (Climate) अवलंबून असेल, असे मत द्राक्ष उत्पादकांनी (Grape Farmer) व्यक्‍त केले आहे. अतिपावसाने काही बागांचा केलेला घात, लांबलेल्या छाटण्या याचाही किती परिणाम उत्पादकांच्या उत्पादनावर होतो, हे पाहणे महत्त्वाचे ठरेल. काही शिवारातील द्राक्ष उत्पादनातील (Grape Production) घट ही मोठी असेल, असे शेतकरी सांगतात.

जालना जिल्ह्यातील कडवंची, नंदापूर, धारकल्याण, पिरकल्यान, वरूड, वरुडी, बोरखेडी आदी शिवारात मोठ्या प्रमाणात द्राक्ष बागा आहेत. शिवाय औरंगाबाद जिल्ह्यातील सटाणा, पळशी परिसरातही द्राक्ष बागांचा विस्तार झाला आहे.

द्राक्ष उत्पादक चंद्रकांत क्षीरसागर म्हणाले, ‘‘ यंदा अतिपावसाने कडवंची शिवारातील २० ते ३० टक्‍के बागांना फटका बसला. काही अंशी वातावरण पोषक असले तरी यंदा कडवंची शिवारात ऐरवी २५ नोव्हेंबरपर्यंत चालणाऱ्या छाटण्या जवळपास ५ डिसेंबरपर्यंत चालल्या. टप्पेनिहाय झालेल्या छाटणीत जवळपास २० ते ३० टक्‍के बागा फुटल्याच नाहीत.

केवळ ३० ते ४० टक्‍के बागा बऱ्यापैकी फुटल्या. आता ढगाळ वातावरण आहे. त्यामुळे डाऊनीचा प्रादूर्भाव आहेच. ’’ नंदापूरचे चव्हाण म्हणाले, ‘‘छाटण्या उशिरा झाल्याने हंगाम यंदा लांबण्याची शक्‍यता आहे.’’

‘थिनिंगवर भर, लोड कमी’

‘‘गेल्या हंगामात द्राक्षात अपेक्षित गोडी नव्हती. कदाचित घडांची व त्यामध्ये मण्यांची संख्या जास्त यामुळे गोडी नसावी म्हणून यंदा शेतकऱ्यांनी नैसर्गिकरीत्या अपेक्षित गळ न झाल्याने कृत्रिमरीत्या गळ होण्यासाठी प्रयत्न केले. त्यासाठी थिनिंगही केली. त्यामुळे गोडी चांगली येण्याची आशा आहे,’’ असे द्राक्ष उत्पादक दत्तात्रेय चव्हाण म्हणाले.

जानेवारीअखेरीस उत्पादन सुरू

कडवंची, नंदापूर शिवारातील द्राक्ष बागांमधील उत्पादन साधारणतः २६ जानेवारीनंतर सुरू होईल. औरंगाबाद जिल्ह्यातील सटाणा शिवारातही तीच स्थिती असेल. किमान १५ एप्रिलपर्यंत हंगाम सुरू राहील, अशी माहितीही द्राक्ष उतादक शेतकऱ्यांनी दिली.