उन्हाळ पिकांच्या लागवडीत यंदा शेतकऱ्यांनी कडधान्य, तृणधान्य लागवडीसह तेलबियांनाही पसंती दिली आहे. गेल्यावर्षीच्या तुलनेत भुईमूग, मका, भातपीक लागवडीचे क्षेत्र घटले आहे. शेतकऱ्यांनी तृणधान्यात मूग, उडीद लागवडीवर भर दिला आहे. गेल्या वर्षीच्या तुलनेत या वर्षी उन्हाळ पिकांच्या (Summer Crops) लागवड क्षेत्रात ५.१ टक्क्यांची वाढ झाली आहे. केंद्रीय कृषी मंत्रालयाने दिलेल्या आकडेवारीनुसार शुक्रवारपर्यंत (दिनांक २७ मे) यंदा ७६.४१ लाख हेक्टर क्षेत्रात उन्हाळ पिकांची लागवड करण्यात आली आहे.

केंद्रीय कृषी मंत्रालयाच्या (Agriculture Ministry) माहितीनुसार, भातपीक (Paddy) आणि भुईमूग (Groundnut) वगळता अन्य प्रमुख पिकांच्या लागवड क्षेत्रात यंदा वाढ झाली आहे. भातपिकाच्या लागवडीखालील क्षेत्र गेल्यावर्षीच्या तुलनेत ३.३ टक्क्यांनी घटले आहे. या उन्हाळ्यात ३०.३३ लाख हेक्टर क्षेत्रात भातपिकाची (Paddy) लागवड करण्यात आली.

या उन्हाळ्यात तेलबिया (Oil Seeds)लागवडीखालील क्षेत्र २.२ टक्क्यांनी वाढले असून ११.१७ लाख हेक्टर क्षेत्रात तेलबिया घेण्यात आल्या आहेत. तृणधान्य (Cereals) लागवड क्षेत्रातही ९.६ टक्क्यांनी वाढ झाली आहे. ११.८६ लाख हेक्टर क्षेत्रात तृणधान्याची लागवड करण्यात आली आहे. तृणधान्य लागवडीत गेल्यावर्षीच्या तुलनेत मक्याचे (Maize) क्षेत्र २.५ टक्क्यांनी घटले आहे. या उन्हाळ्यात केवळ ७.३६ लाख हेक्टर क्षेत्रात मका घेण्यात आला आहे.

या उन्हाळ्यात शेतकऱ्यांनी कडधान्य (Pulses) लागवडीस पसंती दिली असून २३.०५ लाख हेक्टर क्षेत्रात कडधान्याची लागवड करण्यात आली आहे. गेल्या वर्षीच्या तुलनेत यंदाच्या उन्हाळ्यातील कडधान्य लागवड क्षेत्रात १७.३ टक्के वाढ झाली आहे. कडधान्यांत शेतकऱ्यांनी मूग लागवडीस (१९.१६ लाख हेक्टर) प्राधान्य दिले असून मूग लागवडीखालील क्षेत्रात १५.६ टक्क्यांची वाढ झाली आहे. मुगाबरोबरच उडीद लागवडीतही (३.६५ लाख हेक्टर) ३५.५ टक्क्यांनी वाढ झाली आहे.

मध्य प्रदेश, बिहार, ओडिशा, तामिळनाडू आदी राज्यांत कडधान्य लागवडीखालील क्षेत्र वाढले आहे. मध्य प्रदेशात ९.०३ लाख हेक्टर क्षेत्रात कडधान्य लागवड करण्यात आली आहे. बिहारमध्ये ४.१६ लाख हेक्टर क्षेत्रात कडधान्य लागवड करण्यात आली आहे. ओडिशात २.६१ लाख हेक्टर, तामिळनाडूत २ लाख हेक्टर, उत्तर प्रदेशात १.५३ लाख हेक्टर, गुजरातमध्ये ९६ हजार हेक्टर, पश्चिम बंगालमध्ये ७३ हजार हेक्टर, पंजाबमध्ये ५२ हजार हेक्टर, आंध्र प्रदेशात ३५ हजार हेक्टर, छत्तीसगडमध्ये ३५ हजार हेक्टर आणि महाराष्ट्रात २६ हजार हेक्टर क्षेत्रात कडधान्य लागवड करण्यात आली आहे.