Orange Farming वाशीम ः ‘‘संत्रा उत्पादकांनी अधिक उत्पादनावर (Orange Production) भर देण्यासोबतच निर्यातक्षम (Orange Export) व उत्तम गुणवत्तेची फळे तयार करण्यासाठी पुढे आले पाहिजे. ग्राहकांना उच्च प्रतीची संत्रा फळे उपलब्ध करून दिल्यास बाजारपेठेत अधिक दर मिळू शकतील,’’ असे प्रतिपादन राज्याचे प्रधान सचिव (कृषी) एकनाथ डवले (Eknath Davale) यांनी केले.

श्री. डवले वडजी येथे आयोजित कार्यक्रमात संत्रा उत्पादकांसोबत बोलत होते. कृषी विज्ञान केंद्र व कृषी विभागातर्फे वडजी येथे संत्रा उत्पादकांसाठी शुक्रवारी (ता.१७) चर्चासत्र झाले.

या वेळी विभागीय कृषी सहसंचालक के. बी. मुळे, जिल्हा परिषदेचे माजी अध्यक्ष मारोतराव लादे, जिल्हा अधिक्षक कृषी अधिकारी शंकर तोटावार, ‘केव्हीके’चे उद्यानविद्यातज्ज्ञ निवृत्ती पाटील, सेवानिवृत्त कृषी अधिकारी प्रल्हाद शेळके, तुषार देशमुख उपस्थित होते.

श्री. डवले यांनी संत्रा उत्पादकांसोबत चर्चा करीत ते अवलंबित असलेल्या उत्पादन तंत्राबद्दल माहिती घेतली. फळांची व बागांची उत्तम गुणवत्ता पाहून शेतकऱ्यांचे कौतुक केले.

‘केव्हीके’च्या मार्गदर्शनात संत्रा उत्पादक गटाद्वारे निर्मित वाण ‘वाशीम संत्रा’ या ब्रँडच्या नावाचे कौतुकही केले. सर्व प्रथम शंकरराव बोरकर, राजेश बोरकर, शिवाजी शेजूळ यांच्या संत्रा बागांची पाहणी करण्यात आली.

श्री. मुळे यांनी पॅकहाउस, शेततळे व फळबाग लागवड योजनांबद्दल मार्गदर्शन केले.श्री. तोटावार यांनी संत्रा शेती शाळा व कृषी विभागाच्या विविध योजनांची माहिती दिली.

श्री. पाटील यांनी केव्हीकेद्वारे सुरू करण्यात आलेल्या संत्रा गटशेती उपक्रमाची माहिती दिली. तालुका कृषी अधिकारी चंद्रकांत उलेमाले व इतर कर्मचाऱ्यांनी कार्यक्रमासाठी पुढाकार घेतला.