Buldana News : जिल्ह्यातील शेगाव हे ठिकाण संत गजानन महाराज मंदिरामुळे देशभर पोहोचले आहे. या ठिकाणी असलेली कृषी उत्पन्न बाजार समितीचे रुपडेही आता बदलणाच्या मार्गावर आहे.

स्वारस्य अभियोक्ती योजनेअंतर्गत मुख्य बाजारात नवीन इमारतीसह व्यावसायिक गाळ्यांच्या बांधकामाला पणन महासंघाने मंजुरी दिली आहे. यामुळे कृषी उत्पन्न बाजार समितीची नवीन इमारत उभी राहणार असून, बाजार समितीच्या वैभवात भर पडणार आहे.

कृषी उत्पन्न बाजार समितीच्या मुख्य बाजारात नियोजित २६ व्यावसायिक गाळ्यांचे संकुल बांधकाम करण्यासाठी पणन संचालकांनी १७ ऑगस्टला काढलेल्या आदेशानुसार मंजुरी दिली आहे. त्यानुसार समितीच्या मुख्य बाजार आवार जागेवर स्वारस्य अभियोक्ती योजनेअंतर्गत कार्यालयीन इमारतीसह २६ व्यापारी गाळ्यांचे बांधकाम करण्यात येईल.

शेतीपूरक व्यवसायाकरिता २९ वर्षांच्या कालावधीसाठी अनामत घेऊन लीज भाडेतत्त्वावर गाळे रजिस्टर कराराने मिळू शकतील. इच्छुक व्यावसायिकांकडून गाळे मागणीचे अर्ज ३० ऑगस्ट ते १५ सप्टेंबर २०२३ या कालावधीत समितीद्वारे मागविण्यात आले आहेत.

नियम व अटी, तसेच अर्ज प्रक्रियेबाबत अधिक माहितीसाठी बाजार समितीमध्ये संपर्क करण्याचे आवाहन केले आहे. स्वारस्याची अभियोक्ती या शीर्षाखाली गाळे वाटप करण्याचे अथवा रद्द करण्याचे अधिकार राखून ठेवल्याची माहिती सभापती गोपाळ मिरगे, उपसभापती श्रीकांत तायडे, सचिव विलास पुंडकर यांनी दिली.