पेण : आठ दिवसांपासून हस्त नक्षत्राचा जोरदार पाउस सुरू आहे. त्यात राज्यात अनेक ठिकाणी पावसाने दाणादाण (Heavy Rainfall) उडवली असताना पेण तालुक्यातही (Pen Taluka) उभी पिके आडवी होण्याची भीती शेतकऱ्यांना लागली आहे. यामुळे भातशेती नुकसानीचा (Crop Damage) धसका शेतकऱ्यांनी घेतला आहे.

यावर्षी पावसाने सुरुवातीपासूनच जोरदार सुरुवात केली. त्यामुळे काही ठिकाणी शेतकऱ्यांना दुबार पेरणी करावी लागली. त्यानंतर पाऊस समाधानकारक झाल्याने तालुक्यातील जवळपास १२ ते १३ हजार हेक्टर जमीन भात लागवडीखाली आहे. येथील सर्व भातपिके चांगली झाली आहेत. त्यामुळे शेतकरी राजा चांगला खुशीत आहे.

येथील शेतकऱ्यांनी कर्जत, कोलम, वाडा कोलम, जया, रत्ना, अवनी या विविध जातींच्या भातांची लागवड केली असून, ही पिके नवरात्रोत्सवानंतर चार-आठ दिवसांनी कापणीयोग्य होतात. अनेक भातपिकांची कणसे बाहेर येऊन कसदार आणि उत्तम बनत गेली आहे.

परंतु हस्त नक्षत्राचा पाऊस पेण तालुक्यात सुरू असल्याने शेतकरी हवालदिल झाले असून पिके आडवी होण्याची भीती त्यांना वाटू लागली आहे.

पेण तालुक्यामध्ये भातशेती चांगल्या प्रकारे आली आहे. हस्त नक्षत्राच्या पावसामुळे हे पीक वाया जाण्याची भीती वाटत आहे. एककीडे शेतकरी अनेक संकटांचा सामना करत आहे. जर पाऊस सतत पडत राहिला, तर उभी पिके आडवी होण्याची भीती वाटत आहे. त्यामुळे सरकारने नुकसानग्रस्त शेतकऱ्यांना तत्काळ मदत करावी.

- किरण म्हात्रे, शेतकरी, दिव