Sindhudurg News : जिल्ह्यात पावसाला सुरवात झाल्यामुळे भातरोपे पुनर्लागवडीला शेतकऱ्यांनी सुरवात केली आहे. या भात रोपवाटिका मेअखेरीस तयार केल्या होत्या. पहिल्या टप्प्यातील १० टक्क्यांहून अधिक भात रोपवाटिकांमधील रोपांची पुनर्लागवड सुरू झाली आहे. या लागवडीला दहा दिवस विलंब झाला आहे.

जिल्ह्यात तीन टप्प्यांत भात रोपवाटिका तयार केल्या जातात. पाणी उपलब्ध असणारे शेतकरी २० मेपर्यंत भातरोपवाटिका तयार करतात. तर काही शेतकरी मॉन्सूनपूर्व पाऊस झाल्यानंतर, तर उर्वरित शेतकरी मॉन्सून सुरू झाल्यानंतर भात रोपवाटिका तयार करतात. यावर्षी हळवा, निमगरवा आणि गरवा अशा बियाण्यांचा वापर करण्यात आला आहे. यामध्ये संकरित, सुधारित आणि पारंपरिक बियाण्यांचा देखील समावेश आहे.

यावर्षी १० टक्के शेतकऱ्यांनी २० मे च्या सुमारास रोपवाटिका तयार केल्या. ही रोपे ८ ते १० जूनच्या दरम्यान लागवडीस तयार झाली. परंतु पावसाअभावी पुनर्लागवड करणे शक्य झाले नाही. २४ जूनपासून पावसाने हजेरी लावली. गेले दोन दिवस जिल्ह्यांच्या सर्व भागात दमदार पाऊस पडत आहे.

त्यामुळे शेतकऱ्यांनी भातरोपे पुर्नलागवडीला सुरवात केली आहे. कणकवली तालुक्यातील चिंचवली, खारेपाटण, शेर्पे या गावांत मोठ्या प्रमाणात रोपवाटिका २० ते २५ मे या कालावधीत तयार केल्या. या शेतकऱ्यांसह कुडाळ तालुक्यातील शेतकऱ्यांनी लागवडीला प्रारंभ केला आहे. जिल्ह्यात १० टक्के क्षेत्रावरील पुनर्लागवड येत्या चार ते पाच दिवसांत पूर्ण होईल.

मुख्य पुनर्लागवडीला विलंब होणार

११ जूनला मॉन्सूनच्या आगमनानंतर एक दोन दिवसांत ४० टक्के क्षेत्रावर भात रोपवाटिका तयार करण्यात आल्या. त्यानंतर २४ आणि २५ जूनला उर्वरित भात रोपवाटिका झाल्या. त्यातील रोपे पुर्नलागवडीस तयार होण्यास अजून आठ ते दहा दिवसांचा कालावधी लागेल. त्यामुळे जुलैच्या दुसऱ्या आठवड्यापासून मुख्य पुर्नलागवडीस प्रारंभ होईल, असा अंदाज आहे.