नांदेड : जिल्ह्यात जून ते ऑगस्ट दरम्यान अतिवृष्टीमुळे (Heavy Rain) सात लाख ४१ हजार शेतकऱ्यांचे पाच लाख २७ हजार हेक्टरवरील खरीप, बागायती व फळपिकांचे ३३ टक्क्यांपेक्षा अधिक नुकसान (Crop Damage) झाले होते. यात बाधितांना लागणारा ७१७ कोटी ८८ लाख ९१ हजार सहाशे रुपयांचा निधी (ता. २१) सप्टेंबर रोजी जिल्हा प्रशासनाला प्राप्त झाला आहे.

तत्काळ निधी सोळा तालुक्यांना वितरित केला आहे. हा निधी जिल्हा मध्यवर्ती सहकारी बँकेमार्फत वितरित होणार आहे. निधी वितरित दोन आठवड्यांपेक्षा अधिक कालावधी होवूनही अद्याप भरपाई शेतकऱ्यांना मिळाली नाही.

जिल्ह्यात यंदा जून ते ऑगस्ट महिन्या दरम्यान झालेल्या जोरदार पावसामुळे अनेक मंडळांत एकापेक्षा अधिकवेळा अतिवृष्टीची नोंद झाली होती. जुलैमध्ये तर एका महिन्यात विक्रमी ६०६ मिलिमीटर पाऊस होऊन पिकांची दाणादाण उडाली होती. अतिवृष्टीमुळे नदी-नाल्यांना पूर येऊन नदीकाठची जमीन खरडून गेली.

सखल भागातील पिके पाण्याखाली गेल्याने जिरायतीमधील सोयाबीन, कपाशी, ज्वारी, तूर, उडीद, मूग या पाच लाख २७ हजार १४१ हेक्टरवरील पिकांसह ३१४ हेक्टरवरील बागायती व ६६ हेक्टरवरील फळपिके असे एकूण पाच लाख २७ हजार ४९१ हेक्टरवरील पिकांचे ३३ टक्क्यांपेक्षा अधिक नुकसान झाले होते. यात सात लाख ४१ हजार ९४६ शेतकऱ्यांना फटका बसला.

या नुकसानग्रस्तांना भरपाई देण्यासाठी जिल्हा प्रशासनाने एनडीआरएफच्या नव्या निकषानुसार (दुप्पट भरपाई) जिल्ह्यासाठी ७१७ कोटी ८८ लाख ९१ हजार सहाशे रुपयांची मागणी राज्य शासनाकडे केली होती. यानुसार ७१७ कोटी ८८ लाख ९१ हजार सहाशे रुपयांचा निधी (ता. २१) सप्टेंबर रोजी जिल्हा प्रशासनाला प्राप्त झाला.

यानंतर हा निधी लगेच सर्वच सोळा तालुक्यांना वितरित केला. हा निधी जिल्हा मध्यवर्ती सहकारी बँकेमार्फत वितरित होणार आहे. निधी वितरित होऊन दोन आठवड्यांपेक्षा अधिक कालावधी होवूनही अद्याप भरपाई शेतकऱ्यांना मिळाली नाही. त्यामुळे दिवाळीपूर्वी निधी वाटपाची शक्यता धूसर झाली आहे.

तालुकानिहाय वितरित केलेला निधी (रुपयांत)

नांदेड-२५ कोटी ८९ लाख ५२,२००, अर्धापूर-२९ कोटी १६ लाख ५२,०००, कंधार-५५ कोटी १२ लाख ६०,०००, लोहा-६१ कोटी ५, लाख ४,०००, देगलूर -४२ कोटी ९५ लाख ४,८००, मुखेड-५४ कोटी ७० लाखक १९,२००, बिलोली-४० कोटी ३५ लाख ३९,२००, नायगाव - ४१ कोटी ५ लाख ४७,०००, धर्माबाद-२९ कोटी ५३ लाख ९८,८००, उमरी-४० कोटी ११ लाख ३२,०००, भोकर-५२ कोटी ४३ लाख ७,२००, मुदखेड-२४ कोटी २७ लाख ५,६००, हदगाव-८५ कोटी २० लाख २८,०००, हिमायतनगर-४२ कोटी ७४ लाख ७,२००, किनवट-६७ कोटी ९ लाख १५,२००, माहूर-२२ कोटी २० लाख १९,२००, एकूण ः ७१७ कोटी ८८ लाख ९१,६००.