परभणी : परभणी, हिंगोली जिल्ह्यांतील ८२ मंडलांत गुरुवारी (ता. ६) सकाळी आठपर्यंतच्या २४ तासांत हलका ते जोरदार पाऊस झाला. (Rainfall) हिंगोली जिल्ह्यातील सिरसम(६५.५ मिमी), माळहिवरा (६६.६), वाकोडी (६७), नांदापूर (१०५.५), डोंगरकडा (८०) या पाच मंडलांत अतिवृष्टी (Heavy Rain) झाली.

मुसळधार पावसामुळे शेतात कापणी केलेले सोयाबीनचे पीक तसेच बोंडातून फुटलेला कापूस भिजल्याने शेतकऱ्यांचे मोठे नुकसान झाले. परभणी जिल्ह्यातील ५२ मंडलांत हलका ते जोरदार पाऊस झाला. परभणी, जिंतूर, सेलू तालुक्यांतील अनेक मंडलांत पावसाचा जोर होता.

जिल्ह्यात गेल्या २४ तासांत सरासरी १०.८ मिमी, ऑक्टोबर महिन्यात १५.४ मिमी, तर १ जूनपासून एकूण सरासरी ६६५.८ मिमी पाऊस झाला. हिंगोली जिल्ह्यातील ३० मंडलांत हलका ते जोरदार पाऊस झाला. हिंगोली, कळमनुरी, वसमत, औंढा नागनाथ,

सेनगाव तालुक्यातील अनेक मडंलांत पावसाचा जोर होता. हिंगोली, कळमनुरी तालुक्यांतील पाच मंडलांत अतिवृष्टी झाली. अनेक गावांत ढगफुटीसदृश पावसामुळे पिकांचे मोठे नुकसान झाले. जिल्ह्यात गेल्या २४ तासांत सरासरी ४१.९ मिमी, ऑक्टोबरमध्ये आजवर सरासरी ४२.६ मिमी, १ जूनपासून एकूण सरासरी ९२८.२ मिमी पाऊस झाला.