Akola News : दिवसेंदिवस पाऊस लांबत चालल्याने जिल्ह्यात पिकांची अवस्था बिकट झाली आहे. प्रामुख्याने कोरडवाहू व हलक्या जमिनीतील पिकांचे उत्पादन ५० टक्क्यांपेक्षा जास्त, तर उर्वरित क्षेत्रालाही उत्पादकतेत फटका बसण्याची शक्यता वाढली आहे. जिल्ह्यात तब्बल २० मंडले सध्या दुष्काळी परिस्थितीतून जात आहेत.

पंतप्रधान पीकविमा योजनेअंतर्गत या खरीप हंगामात ज्या महसूल मंडलात कमी पावसामुळे ५० टक्के उत्पादन घटीची शक्यता निर्माण झाली आहे, अशा मंडलातील शेतकऱ्यांना २५ टक्के मर्यादेत आगाऊ रक्कम देण्याची तरतूद आहे. या अनुषंगाने जिल्ह्यातील २० महसूल मंडले निश्‍चित करण्यात आली आहेत.

या मंडलांमध्ये पावसाचा मोठा खंड निर्माण झाला. पंतप्रधान पीकविमा योजनेअंतर्गत प्रतिकूल परिस्थितीमुळे शेतकऱ्यांच्या अपेक्षित उत्पादनात मागील सात वर्षांच्या सरासरी उत्पादनाच्या ५० टक्क्यांपेक्षा जास्त घट अपेक्षित असल्याचे प्रथम दर्शनी दिसत आहे.

परिणामी जिल्हाधिकारी या मंडलांमध्ये नुकसान भरपाईच्या दृष्टीने अहवाल मागविणार आहेत. अहवाल आल्यानंतर पीकविमा कंपनीला २५ टक्के अग्रिम देण्याबाबत कार्यवाही होऊ शकते. या मंडलांमध्ये लवकरच सर्वेक्षणाचे काम सुरू होण्याची शक्यता आहे.

जिल्ह्यात अकोट तालुक्यात उमरा, तेल्हारामध्ये माळेगाव, पाथर्डी, बाळापूर तालुक्यात बाळापूर, उरळ, निंबा, हातरुण, पातूर, अकोला तालुक्यात घुसर, बोरगाव, पळसो बढे, सांगळूद, कुरणखेड, बार्शीटाकळी तालुक्यात धाबा, मूर्तिजापूर तालुक्यात मूर्तिजापूर, हदगाव, निंबा, माना, शेलू आणि जामठी अशा मंडलांचा समावेश आहे.

या मंडलांमध्ये २४ जुलैपासून पावसाने खंड दिलेला आहे. काही मंडलांत २१ ते २७ दिवसांपर्यंत खंडाचा कालावधी झालेला आहे. अद्यापही पाऊस येण्याची चिन्हे दिसत नसल्याने तब्बल एक महिना पावसात खंड निर्माण होऊ शकतो. त्यामुळे येत्या काही दिवसांत इतर मंडलांचाही समावेश या यादीत वाढण्याची शक्यता नाकारता येत नाही.