परभणी ः Rabbi Season : यंदाच्या (२०२२-२३) रब्बी हंगामात परभणी जिल्ह्यात ३ लाख ४ हजार २३२.३८ हेक्टर पेरणी झाली आहे. त्यापैकी ५० हजार २३१.१६ हेक्टर (१६.५१ टक्के) क्षेत्राची ई पीक पाहणी नोंदणी झाली आहे.

अजून २ लाख ५४ हजार १.२२ हेक्टरवरील ई-पीकपाहणी (E- pik pahani) नोंदणी शिल्लक आहे. अनेक गावशिवारात इंटरनेट कनेक्टीव्हटीचा अभाव, सर्व्हर डाऊनची समस्यांमुळे ई-पीक पाहणीसाठी शेतकऱ्यांना अडचणी येत आहेत.

अनेक तलाठ्यांना या कामात फारसे स्वारस्य दिसत नाही. त्यामुळे तलाठी स्तरावरील ई-पीक पाहणी रखडत चालली आली आहे. परिणामी शेतकऱ्यांना चालू वर्षीच्या शेती पिकांचा पेरा तसेच फळपीकांची लागवडीची नोंद असलेला अद्ययावत सात-बारा उतारा वेळेवर मिळणे दुरापस्त झाले आहे.

परभणी जिल्ह्यात रब्बीचे सरासरी क्षेत्र २ लाख ७० हजार ७९८ हेक्टर असताना शुक्रवार (ता. १३) पर्यंत ३ लाख ४ हजार २३२ हेक्टरवर (११२.३५ टक्के) पेरणी झाली. त्यापैकी ५० हजार २३१.१६ हेक्टर क्षेत्राची ई-पीक पाहणी झाली आहे.

गतवर्षी (२०२१-२२) रब्बीतील २ लाख ७१ हजार १४२ हेक्टर पेरणी क्षेत्रापैकी ५१ हजार ९११.५२ हेक्टर(१९.१५ टक्के) क्षेत्राची ई-पीक पाहणी झाली होती.

यंदाच्या खरिपातील ५ लाख ७६ हजार ६४३.५२ हेक्टर पेरणी क्षेत्रापैकी ४ लाख ४७ हजार २७८.५३ हेक्टर (८८.११ टक्के) ई पीक पाहणी झाली. गतवर्षी (२०२१-२२) खरिपात ५ लाख ५० हजार हेक्टर पेरणी क्षेत्रापैकी १ लाख ८६ हजार ७२.७८ हेक्टर (३६.८५ टक्के) ई-पीक पाहणी झाली होती.

तलाठी स्तरावर उदासीनता...

महसूल, कृषी, ग्रामविकास विभागांनी पुरेशी जनजागृती न केल्यामुळे असंख्य शेतकरी या ई-पीक पाहणी बद्दल अनभिज्ञ आहेत. त्यामुळे जिल्ह्यातील सर्व शेतकरी खातेदारांनी ई-पीक केलेली दिसत नाही.

शेतकरी स्तरावरील ई-पीक झाल्यानंतर तलाठ्यांनी मंजुरी देऊन अद्ययावत पीक पेरा असलेला सात बारा देणे आवश्यक असताना अनेक तलाठी या कामात कमालीची उदासीनता दाखवत आहेत.

संबंधित पिकांचे सर्वसाधारण क्षेत्र आणि पेरणी क्षेत्र याबाबत ई पीक यंत्रणेमध्ये संभ्रमाची स्थिती आहे. त्यामुळे परभणी जिल्ह्यात कृषी विभागातील नोंदीनुसार खरीप आणि रब्बी हंगामात प्रत्यक्ष पेरणी केलेल्या संपूर्ण क्षेत्राची ई-पाहणी झाल्याचे दिसत नाही.