सिंधुदुर्गनगरी ः जिल्ह्यात गेल्या पंधरा दिवसांत अवघी पाच टक्केच भातकापणी (Paddy Harvesting) झाली आहे. परतीच्या पावसामुळे भातकापणी (Paddy) रखडली होती. परंतु गुरुवारी (ता. २०) पावसाने उघडीप देताच काही शेतकऱ्यांनी कापणीला सुरुवात केली आहे.

खरीप हंगामात जिल्ह्यात ६० हजार हेक्टरवर यावर्षी भातपीक लागवड करण्यात आली आहे. विजयादशमीपूर्वीच जिल्ह्यातील सुमारे ५० टक्के भातपीक कापणीयोग्य झाले होते. शेतकऱ्यांनीदेखील नवरात्रोत्सवानंतर भातकापणीची पूर्वतयारी केली होती. परंतु त्याच वेळी जिल्ह्यात परतीच्या पावसाची झोड सुरू झाली.

सतत परतीचा पाऊस पडत असल्यामुळे शेतकऱ्यांना भातकापणी करता आली नाही. गेले आठ ते दहा दिवस तर परतीच्या पावसाने जिल्ह्याला अक्षरशः झोडपून काढले. अनेक भागांत पावसाचे पाणी भातपिकावरून वाहत होते.

त्यामुळे काही भागांत भाताचे मोठे नुकसान झाले. सद्यःस्थितीत जिल्ह्यातील ८० टक्के भातपीक परिपक्व स्थितीत आले आहे. त्यातील अवघ्या ५ टक्के पिकाची कापणी आतापर्यंत झाली आहे. दरम्यान, गुरुवारी सकाळपासून पावसाने उघडीप दिल्यामुळे शेतकऱ्यांनी भातकापणीला सुरुवात केली आहे.

सकाळपासून शेतकऱ्यांची लगबग शेतमळ्यांमध्ये दिसून येत आहे. पावसाने उघडीप दिली तर भातकापणीला वेग येणार आहे. परिपक्व असलेल्या भातपिकाची कापणी येत्या पाच-सहा दिवसांत झाली नाही तर शेतकऱ्यांचे मोठे नुकसान होणार आहे. त्यामुळे शेतकरी पाऊस थांबण्याच्या प्रतीक्षेत आहेत.