Amravati News : जिल्ह्यात खरीप पीक कर्जाच्या उद्दिष्टाच्या ५७ टक्के वितरण झाले असून, त्यात राष्ट्रीय व खासगी बँकांचा वाटा कमी आहे. त्यामुळे २० टक्क्यांहून कमी कर्ज वितरण करणाऱ्या सर्व बँकांना ‘कारणे दाखवा’ नोटीस बजावतानाच, येत्या पंधरवड्यात कामगिरी न सुधारल्यास कठोर कारवाई करू, असा इशारा जिल्हाधिकारी विजय भाकरे यांनी दिला.

खरीप पीककर्ज वितरण व पंतप्रधान सूक्ष्म अन्न प्रक्रिया उद्योग योजनेबाबत बँक अधिकाऱ्यांची बैठक जिल्हाधिकाऱ्यांच्या अध्यक्षतेखाली महसूलभवनात झाली, त्या वेळी ते बोलत होते. अग्रणी बँकेचे व्यवस्थापक पंकजकुमार, कृषी अधिकारी गजानन देशमुख यांच्यासह सर्व बँकांचे अधिकारी उपस्थित होते. येत्या खरीप हंगामासाठी १ हजार ४५० कोटी पीककर्जाचे उद्दिष्ट निश्चित आहे.

त्यात आजपर्यंत ५७ टक्के कर्जवितरण झाल्याचे दिसते. तथापि, या आकडेवारीत जिल्हा मध्यवर्ती सहकारी बँकेचा वाटा ८९ टक्के आहे. उर्वरित राष्ट्रीय व खासगी बँकांची कामगिरी समाधानकारक नाही. त्यात तत्काळ सुधारणा करून येत्या १५ दिवसांत अधिकाधिक कर्जवितरण करून उद्दिष्ट पूर्ण करावे, असे निर्देश त्यांनी दिले.

पीककर्ज वितरणात जिल्हा मध्यवर्ती सहकारी बँकेने आतापर्यंत चांगली कामगिरी केल्याबद्दल त्यांनी अभिनंदन केले. ते म्हणाले, की कर्ज वितरण प्रक्रिया सुलभ असावी. शेतकरी बांधवाची अडवणूक होता कामा नये.

अर्ज प्रलंबित ठेवू नयेत. त्यात त्रुटी असल्यास पूर्तता करून घ्यावी. अनावश्यक कागदपत्रे मागू नयेत. शेतकऱ्यांच्या अडचणी जाणून घेऊन संवेदनशीलता बाळगून त्यांना कर्ज मिळण्यासाठी संपूर्ण सहकार्य करावे, असे निर्देश त्यांनी दिले.