देवळा, जि. नाशिक : नाशिक (Nashik) व जळगाव (Jalgaon) जिल्ह्याला वरदान ठरणाऱ्या नार-पार गिरणा नदीजोड प्रकल्पास राज्य शासनाच्या ८ हजार कोटींच्या निधीतून येत्या दोन महिन्यात मान्यता देण्यात येईल,

असे उपमुख्यमंत्री देवेंद्र फडणवीस यांनी विधानसभेत सांगितले, अशी माहिती आमदार डॉ. राहुल आहेर यांनी दिली.

उपमुख्यमंत्री फडणवीस म्हणाले, की नार-पार गिरणा नदीजोड योजनेमुळे नाशिक व जळगाव जिल्ह्यातील ५८ हजार ७६१ हेक्टर क्षेत्राला सिंचनाचा लाभ मिळणार आहे. नार-पार प्रकल्पासाठी गेल्या अधिवेशनातदेखील चर्चा झाली होती.

विविध नेते व लोकप्रतिनिधींनी या प्रकल्पासाठी पाठपुरावा केला होता. चांदवड देवळा विधानसभा मतदारसंघाचे आमदार डॉ. आहेर यांनी शुक्रवार विधानसभेत याबाबत लक्षवेधी सूचना मांडली होती.

त्यात पश्चिमेला जे चाळीस टीएमसी पाणी वाहून जाते परंतु आताच्या डीपीआरमध्ये दहा टीएमसी पाणी वळविण्याचे प्रयोजन आहे, ते आपण वाढवणार का, गोदावरी खोऱ्याला पाणी वळवणे, चांदवड-देवळा तालुक्यांसाठी हायराईज कॅनॉल घेणे, या मागणीची लक्षवेधी सूचना विधानसभेत मांडली होती.

त्या सूचनेस उत्तर देताना उपमुख्यमंत्री देवेंद्र फडणवीस यांनी याबाबत उत्तर दिले.
यासाठी साधारणतः आठ हजार कोटींचा निधी राज्य शासन खर्च करणार असून या योजनेचा सविस्तर प्रकल्प अहवाल राज्यस्तरीय तांत्रिक सल्लागार समितीकडे पाठविण्यात आला आहे.

येत्या दोन महिन्यांत या संदर्भातील सर्व मान्यता मिळून मंत्री उपसमिती आणि मंत्रिमंडळ बैठकीतही त्यास मान्यता देण्यात येईल.

ते म्हणाले की, नार-पार, औरंगा व आंबिका या चार पश्चिमी वाहिनी नद्या महाराष्ट्र राज्यात उगम पाऊन पश्चिमेकडे वाहत अरबी समुद्राला मिळतात.

हे अतिरिक्त पाणीउपसा करून पूर्वेकडील अतितुटीच्या गिरणा उपखोऱ्यात शेती व पिण्याच्या पाण्याचा प्रश्न सोडविण्यासाठी ही योजना प्रस्तावित केली आहे.

नाशिक व जळगावमधील ५८ हजार ७६१ हेक्टर क्षेत्राला लाभ
या योजनेमध्ये ९ धरणे प्रस्तावित आहेत. मानखेडे, सालभोये, मांजरपाडा या ३ लिंकद्वारे २६०.३० दलघमी पाणी उर्ध्वगामी नालिकेद्वारे उपसा करून चणकापूर धरणाच्या पाणलोट क्षेत्रात सोडण्याचे प्रस्तावित असून पुढे ७९.९२ किमी लांबीच्या प्रवाही बंद नलिकेद्वारे सिंचन करणे आहे.

त्याचा लाभ नाशिक जिल्ह्यातील सुरगाणा, कळवण, देवळा, मालेगाव व जळगाव जिल्ह्यातील चाळीसगाव, भडगाव, पारोळा या तालुक्यातील एकूण ५८ हजार ७६१ हेक्टर क्षेत्राला मिळणार आहे.

या प्रकल्पामुळे देवळा तालुक्यातील सिंचनाचा प्रश्न कायमस्वरूपी सुटणार असल्याचे आमदार डॉ. आहेर यांनी सांगितले.