Beed News : कृषी विभाग पथकाच्या पाहणीत सात पेक्षा अधिक सीएससी केंद्राच्या सेवेत त्रुटी आढळून आल्या आहेत. त्यांच्यावर पथक प्रमुख यांच्या सूचनेनुसार कारवाई प्रस्तावित करण्यात आली. यामुळे तालुक्यातील अतिरिक्त शुल्क आकारणाऱ्या सीएससी केंद्र यांच्यामध्ये वचक निर्माण झाला आहे.

जिल्ह्यात पीक विमा योजनेमध्ये सहभाग घेण्यासाठी सीएससी केंद्रात शेतकरी मोठ्या संख्येने सहभाग नोंदवत आहेत. यावेळी यंत्रणा व्यवस्थित कार्यरत राहावी यासाठी जिल्हाधिकारी श्रीमती दीपा मुधोळ मुंडे यांच्या मार्गदर्शनाखाली व जिल्हा अधीक्षक कृषी अधिकारी बाबासाहेब जेजुरकर यांच्या निरीक्षणामध्ये क्षेत्रीय स्तरावर पथक करून पाहणी सुरू आहे.

जिल्हा अधीक्षक कृषी अधिकारी श्री जेजुरकर यांनी पथकाचे संचालन केले. सिरसाळा, दिंडरुड, हेळंब, हळम, धर्मापुरी, परळी, कासारवाडी, गुटेवाडी, वडवणी इत्यादी गावातील सीएससी केंद्रात पथक यांनी प्रत्यक्ष पाहणी केली.

यावेळी तालुका कृषी अधिकारी अशोक सोनवणे, मंडळ अधिकारी महसूल आर. बी. कुमटकर, दिनेश जाधव, बाबासाहेब इनकर, तालुका विमा प्रतिनिधी भागवत डापकर इत्यादी उपस्थित होते.

यावेळी श्री. जेजुरकर साहेब यांनी शेतकऱ्यांनी १ रुपये प्रति अर्ज प्रमाणे विमा योजनेमध्ये विमा भरून घ्यावा व आपले पीक नैसर्गिक आपत्ती पासून संरक्षित करून घ्यावे, असे आवाहन केले.

तसेच पीक विमा भरताना सीएससी चालकांनी कसल्याही प्रकाराचे अतिरिक्त शुल्क आकारण्याची गरज नाही. शासन त्यांना प्रति अर्ज ४० रुपये देते, अतिरिक्त शुल्क आकारणी बदल काही तक्रार असल्यास जवळील तहसील कार्यालय किंवा तालुका कृषी कार्यालय यांना भेट द्यावी असेही त्यांनी सांगितले.