Rain News : आसाममधील अनेक भागात गुरुवारी (ता. २२) सकाळी मुसळधार पाऊस कोसळत होता. त्यामुळे पूरस्थिती गंभीर बनली असून नवीन भागही पाण्याखाली गेले आहेत. राज्यातील दहा जिल्ह्यांमधील १.२ लाख लोक बाधित झाले आहेत, असे अधिकृत निवेदनाद्वारे गुरुवारी सांगण्यात आले.

भारतीय हवामान विभागाने आसाममध्ये ‘ऑरेंज अलर्ट’ दिला असून अत्यंत जोरदार पाऊस ते अतिवृष्टी होण्याचा इशारा दिला आहे. गुवाहाटीतील प्रादेशिक हवामान विभागाने कालपासून २४ तासाचा इशारा दिला होता.

गुरुवार व शुक्रवारसाठी (ता. २३) ‘यलो अलर्ट’ देण्यात आला होता. कारवाईसाठी तयार राहा, असा संदेश ‘ऑरेंज अलर्ट’द्वारे देण्यात येतो तर अंदाज पाहून तयारी करण्यासाठी ‘यलो अलर्ट’ ही संज्ञा वापरली जाते.

आसाम राज्य आप्तकालीन व्यवस्थापन प्राधिकरणाच्या (एअएसडीएमए) पूर अहवालानुसार बस्का, बारपेटा, दरंग, धेमजी, धुबरी आदी जिल्ह्यांमधील एक लाख १९ हजार ८०० नागरिक बाधित झाले आहेत. पावसाचा सर्वाधिक फटका नालबाडीला बसला असून ४५ हजार जण बाधित झाले आहेत.

त्यानंतर बस्का व लखीमपूरमध्येही पूरस्थिती आहे. प्रशासनाने पाच जिल्ह्यांमध्ये १४ निवारा केंद्रे आणि १७ मदत वितरण केंद्रे उभारली आहेत. लष्कर, निमलष्करी दले, राष्ट्रीय व राज्य आपत्ती प्रतिसाद दले, अग्मिशमन आणि आप्तकालिन सेवा, नागरी प्रशासन, सामाजिक संस्था आणि स्थानिकांनी वेगवेगळ्या भागातून बाराशेपेक्षा जास्त लोकांचा बचाव केला आहे.