पुणे : नैर्ऋत्य मोसमी वाऱ्यांचा (मॉन्सून) (Monsoon Winds) परतीचा प्रवास काहीसा अडखळत सुरू आहे. सोमवारी (ता. ३) परतीचा प्रवास सुरू ठेवत संपूर्ण वायव्य भारतासह, गुजरात आणि अरबी समुद्राचा (Gujarat & Arabi Sea) काही भागासह मध्य भारताच्या काही भागांतून मॉन्सून परतल्याचे हवामान विभागाने जाहीर केले आहे.

यंदा दीर्घकालीन सर्वसाधारण वेळेच्या चार दिवस उशिराने मॉन्सूनने वायव्य भारतातून परतीच्या प्रवासाला सुरुवात केली. २० सप्टेंबर रोजी राजस्थान आणि गुजरातच्या कच्छ भागातून मॉन्सूनने परतीचा प्रवास सुरू केला;

मात्र त्यानंतर आठवडाभरापेक्षा अधिक काळ मॉन्सूनच्या परतीची वाटचालीची ‘जैसे थे’ राहिली. २९ सप्टेंबर रोजी परतीचा प्रवास पुन्हा सुरू करत संपूर्ण पंजाब, चंदीगड, राजधानी दिल्लीसह जम्मू काश्मीर, हिमाचल प्रदेश, पश्चिम उत्तर प्रदेश, हरियाना आणि राजस्थानच्या आणखी काही भागांतून परतला होता.

सोमवारी (ता. ३) राजस्थान, हरियाना, हिमाचल प्रदेश, जम्मू काश्मीर, लडाखसह संपूर्ण वायव्य भारतातून मॉन्सून परतला आहे. तर उत्तर अरबी समुद्रासह गुजरातचा बहुतांश भाग, मध्य प्रदेशचा पश्चिम भाग,

उत्तराखंड राज्याच्या काही भागांतून मॉन्सूनने माघार घेतली आहे. उत्तरकाशी, नाझियाबाद, आग्रा, ग्वालियर, रतलाम, भारूच पर्यंत मॉन्सूनच्या परतीची सीमा असल्याचे हवामान विभागाने म्हटले आहे.