सोलापूर ः दक्षिण सोलापूर तालुक्यातील मंद्रूप ग्रामपंचायतीस (Mandroop Grampanchyat) माझी वसुंधरा अभियानांतर्गत उत्कृष्ट कामगिरीसाठी देण्यात येणारा तब्बल एक कोटी रुपयांचा पुरस्कार जाहीर झाला आहे. माझी वसुंधरा अभियानांतर्गत नाशिक जिल्ह्यातील पिंपळगाव बसवंतने राज्यात पहिला आणि मंद्रूप ग्रामपंचायतीने दुसरा क्रमांक पटकावला आहे. तब्बल एक कोटी रुपयांचा पुरस्कार मिळवणारी मंद्रूप ही सोलापूर जिल्ह्यातील पहिलीच ग्रामपंचायत ठरली आहे.

जिल्हा परिषदेचे मुख्य कार्यकारी अधिकारी दिलीप स्वामी आणि उपमुख्य कार्यकारी अधिकारी ईशादिन शेळकंदे यांनी यासाठी विशेष प्रयत्न केले. त्याशिवाय ग्रामसेवक (Gramsevak) नागेश जोडमोटे यांचेही साह्य महत्त्वाचे ठरले. माझी वसुंधरा अभियानामध्ये स्थानिक स्वराज्य संस्थांनी अभियान कालावधीमध्ये केलेल्या कामाचे डेस्कटॅाप मूल्यमापन आणि फिल्ड मूल्यमापन त्रयस्थ यंत्रणेमार्फत करण्यात आले. या दोन्ही मूल्यमापनामध्ये एकूण गुणांच्या आधारे हा पुरस्कार जाहीर करण्यात आला आहे.

माझी वसुंधरा अभियानांतर्गत उच्चतम कामगिरी करणाऱ्या स्थानिक स्वराज्य संस्थांना पुरस्काराच्या रकमेचे वितरण आणि पुरस्काराच्या रकमेच्या विनियोगाची कार्यपद्धती शासनाने निश्‍चित केली आहे, यात स्थानिक स्वराज्य संस्थेमध्ये मंद्रूपने राज्यात द्वितीय क्रमांक मिळवला आहे. याबाबत प्रतिक्रिया देताना मुख्य कार्यकारी अधिकारी स्वामी यांनी या अभियानासाठी आम्ही चळवळ उभी केली, यासाठी झटलेल्या सर्व अधिकारी-कर्मचाऱ्यांचा हा सन्मान आहे. आमच्या कामाची योग्य दखल घेतली गेल्याने समाधान वाटते, असे ते म्हणाले.