ॲग्रोवन वृत्तसेवा
कोल्हापूर : राज्यातील सर्व साखर कारखान्यांचे (Sugar Factory ) वजनकाटे तातडीने ऑनलाइन करा, अशी मागणी स्वाभिमानी शेतकरी संघटनेचे नेते राजू शेट्टी (Raju Shetty ) यांनी राज्याचे अतिरिक्त पोलिस महासंचालक आणि वैधमापन नियंत्रक डॉ. रवींद्रकुमार सिंघल यांच्याकडे केली. यावर साखर कारखान्यांचे वजनकाटे संगणकीय

प्रणाली एकत्र करून तातडीने ऑनलाइन करण्याचे निर्देश त्यांनी संबंधित विभागाला दिले.
राज्यात यंदाचा उसाचा गळीत हंगाम सुरू झाला आहे. अनेक साखर कारखान्यांकडून उसाची सर्रास काटामारी होत आहे. या पार्श्वभूमीवर शेट्टी यांनी डॉ. सिंघल यांची मुंबई येथे भेट घेऊन त्यांच्याशी सविस्तर चर्चा केली.

या वेळी शेट्टी म्हणाले की, उसाच्या वजनात मोठ्या प्रमाणात तफावत येत असल्याने शेतकऱ्यांची प्रचंड मोठी लूट सुरू आहे. महाराष्ट्रात सुमारे ३५ लाख ऊस उत्पादक शेतकरी आहेत. त्यांच्यासाठी उसाचे वजन काटे हे विश्वासार्ह व अचूक असणे आवश्यक आहे. वजन काट्यामध्ये पारदर्शकता नसल्याने वजनात मोठी तफावत येते. खासगी काट्यावर वजन केलेला ऊस साखर कारखानदार नाकारत असल्याच्या तक्रारी येतात. शेतकऱ्यांना पावत्या दिल्या जात नाहीत.

त्यासाठी आपण या विषयाकडे गांभीर्याने पाहणे गरजेचे आहे. शेतकऱ्यांच्या या तक्रारींचे गांभीर्य पाहता वैधमापन विभागाकडून यावर त्वरित कार्यवाही होऊन साखर कारखान्यांच्या वजन काट्यांचे कॅलिब्रेशनमध्ये एकसमानता, सुसूत्रता व पारदर्शकता राहण्याकरिता सर्व वजन काट्यांची कार्यन्वयिन संगणक प्रणाली एकच असणे व त्याचे कॅलिब्रेशन नियंत्रण वैधमापन विभागाकडून व्हावे, यासाठी तातडीने निर्णय घेणे गरजेचे आहे.