Banana MSP : शालेय पोषण आहारामध्ये केळीचा समावेश करण्याची मागणी महाराष्ट्र राज्य केळी उत्पादक संघाने मुख्यमंत्री एकनाथ शिंदे यांच्याकडे केली आहे. केळीला १८.९० रुपयांचा हमीभाव आणि इतर मागण्यांसाठी संघाच्या शिष्टमंडळाने मुख्यमंत्री शिंदे यांची भेट घेतली.

केळी उत्पादक शेतकऱ्यांच्या विविध समस्या आणि मागण्यांसाठी महाराष्ट्र राज्य केळी उत्पादक संघाच्या शिष्टमंडळाने मुख्यमंत्री एकनाथ शिंदे यांची भेट घेतली. यावेळी केळीचा शालेय पोषण आहारात समावेश करण्याच्या मागण्यांसह केळीला हमीभाव मिळावा, प्रतिबंधित असणारी औषधे कृषी सेवा केंद्रावर सापडल्यास संबंधित कृषी अधिकाऱ्यांना जबाबदार धरावे, अशी मागणी शिष्टमंडळाने मुख्यमंत्र्यांकडे केल्या.

शालेय पोषण आहारात होणार केळीचा समावेश

केळी उत्पादकांच्या मागणीला सकारात्मक प्रतिसाद देत मुख्यमंत्री शिंदे येत्या मंत्रिमंडळ बैठकीमध्ये शालेय पोषण आहारामध्ये केळीचा समावेश करण्याबाबतचा विषय घेण्याच्या सूचना मुख्य सचिवांना केल्या आहेत. त्यामुळे येणाऱ्या शैक्षणिक वर्षात विद्यार्थ्यांच्या शालेय पोषण आहारात केळीचा समावेश केला जाण्याची शक्यता आहे.

महाराष्ट्रात मोठ्या प्रमाणात केळीचे उत्पादन घेतले जाते. मात्र, केळी पिकाला कोणत्याही प्रकारचा हमीभाव मिळत नाही. शेतकऱ्यांकडून वारंवार केळीला हमीभाव देण्याची मागणी केली जात आहे. एप्रिलमध्ये सावदा येथे राज्यस्तरीय केळी परिषद पार पडली होती. या परिषदेत केळी उत्पादकांच्या समस्या आणि मागण्यांवर चर्चा करण्यात आली होती. यावेळी या परिषदेत काही ठरावही करण्यात आले होते.

केळी परिषदेतील ठराव

• केळीचा शालेय पोषणात समावेश करणे,

• केळीला. १८.९० रुपये हमीभाव द्यावा.

• विमा कंपन्यांच्या मनमानी थांबवून शेतकऱ्यांना योग्य मोबदला द्यावा.

• तसेच प्रतिबंधित असणारी औषधे, खते कृषी केंद्रावर विक्री केल्यास संबंधित कृषी अधिकाऱ्यांना जबाबदर धरावे.

दरम्यान, गेल्या काही वर्षात अवकाळी पाऊस आणि गारपिटीमुळे केळी पिकाला मोठ्या प्रमाणात फटका बसला आहे. त्यामुळे केळी उत्पादकांना मोठ्या आर्थिक संकटाचा सामना करावा लागत आहे. केळीला मिळणाऱ्या दरातून उत्पादन खर्चही निघत नसल्याने केळी उत्पादक अडचणीत सापडला आहे.