नातेपुते : आमदार रणजितसिंह मोहिते- पाटील यांनी माळशिरस तालुक्याच्या पश्चिम भागाचा दौरा केला. या दौऱ्यात त्यांनी प्रत्यक्ष नुकसानग्रस्त भागात जाऊन पिकांची पाहणी केली. शेतकऱ्यांच्या भेटी घेतल्या व त्यांना दिलासा दिला.

नुकसानग्रस्त भागाचे लवकरच पंचनामे (Crop Damage Survey) करून शेतकऱ्यांना नुकसान भरपाई देण्यासाठी शासनाकडे प्रयत्न करू, असे ते यावेळी म्हणाले.

माळशिरस तालुक्यातील पश्चिम भागात शनिवारी (ता. १८) झालेल्या गारपिटीमुळे हजारो एकर ऊस, द्राक्ष, डाळिंब, पपई, मका, गहू, बाजरी, शेवगा व कडवळ पिकांचे मोठ्या प्रमाणात नुकसान झाले आहे.

आमदार मोहिते- पाटील यांनी या नुकसानग्रस्त भागाचा दौरा करून पिकांची पाहणी केली.

आमदार मोहिते- पाटील यांनी इस्लामपूर, माणकी, भांब, गिरवी व रेडे या गावांना भेट दिली. या गावात सुमारे अर्धा तास गारपीट झाली.

‘शिवामृत’चे संचालक लक्ष्मण पवार यांनी सांगितले की, इस्लामपूर परिसरातील ४०० एकर ऊस, १०० एकर मका, ३० एकर  गहू, १० एकर द्राक्ष, ३ एकर शेवगा व ३ एकर कारले पिकांचे नुकसान झाले आहे.

माणकीचे माजी सरपंच संग्राम रणवरे यांनी सांगितले की, माणकी परिसरातील ऊस, द्राक्ष, डाळिंब, मका, पपई, गहू व हरभरा पिकांचे सुमारे १०० हेक्टरचे नुकसान झाले आहे.

भांबचे प्रगतशील शेतकरी विश्वास सिद यांनी सांगितले की, भांब परिसरातील मका ६० हेक्टर, बाजरी १० हेक्टर, कडवळ ३० हेक्टर, गहू १० हेक्टर व डाळिंब १० हेक्टर पिकांचे नुकसान झाले आहे.