Kolhapur Zilla Parishad Recruitment 2023 : मागच्या कित्येक दिवसांपासून रखडलेला कोल्हापूर जिल्हा परिषद नोकर भरतीचा मार्ग मोकळा झाला आहे. एकूण ७२८ जागांसाठी ही नोकर भरती होणार असून, यासाठीची जाहिरात शनिवारी (ता. ५) प्रसिद्ध होण्याची शक्यता व्यक्त करण्यात आली आहे.

जाहिरात प्रसिद्धीस जिल्हाधिकारी राहुल रेखावार व मुख्य कार्यकारी अधिकारी संतोष पाटील यांनी संमती दिली असून जिल्हा परिषदेच्या विविध विभागातील ७२८ जागा रिक्त आहेत. यापूर्वीही रिक्त जागा भरण्यासाठी २०१९ मध्ये जाहिरात प्रसिद्ध केली होती.

मात्र, ही नोकर भरती रद्द केली. अजूनही या रद्द झालेल्या भरतीचे पैसे संबंधित परीक्षार्थीना पाठवले जात आहेत. तोपर्यंत आता नव्याने भरती प्रक्रिया जाहीर केली आहे. आयबीपीएस कंपनीवर या भरतीची जबाबदारी देण्यात आली असून करार झाल्यानंतर भरतीची प्रक्रिया पूर्ण केली जाणार असल्याची माहिती समोर आली आहे.