Kolhapur ZP : कोल्हापूर जिल्ह्यात दुषित पाण्याचा प्रश्न मागच्या कित्येक वर्षापासून प्रलंबीत आहे. विविध संस्था आणि संघटनांनी पंचगंगा प्रदुषण निर्मुलनासाठी अनेक उपक्रम राबवले परंतु पंचगंगा नदी प्रदुषणाच्या विळख्यात तशीच राहिल्याचे चित्र दिसून येत आहे.

दरम्यान कोल्हापूर जिल्हा परिषदेच्या आरोग्य विभागाने पाणी सर्वेक्षण केले. या सर्वेक्षणात धक्कादायक आकडेवारी समोर आली आहे. कोल्हापूर जिल्ह्यातील तब्बल १८० गावांना दुषित पाणी मिळत असल्याची माहिती समोर आली आहे. दरम्यान ज्या गावांचे पाणी दुषित आढळळे आहे त्या गावांना पिवळे कार्ड देण्यात आले आहे.

याचबरोबर जिल्ह्यातील जवळपास ३ ते ४ गावांत अत्यंत दुषित पाणी आढळले आहे. यातील पन्हाळा तालुक्यातील किसरूळ या ग्रामपंचायतीला लाल कार्ड देण्यात आले आहे. कोल्हापूर जिल्हापरिषदे मार्फत पत्येकवर्षी पावसाळ्याआदी आणि पावसाळा संपल्यानंतर गावाला पाणीपुरवठा होणाऱ्या जल स्त्रोतांची चाचणी घेतली जाते.

या चाचणीचा अहवाल आल्यानंतर त्याची गुणवत्ता तपासून ग्रामपंचायतींना हिरवे, पिवळे व लाल असे कार्ड जिल्हापरिषदे मार्फत दिले जाते. ज्या गावात दुषीत पाणी नाही पिण्यायोग्य पाणी असल्याचा अहवाल आल्यानंतर त्या गावांना हिरवे कार्ड दिले जाते.

दरम्यान दुषीत आणि अतिदुषीत पाणी असलेल्या गावांना पिवळे आणि लाल असे कार्ड दिले जाते. या गावांना साथीचे आजार उद्भवण्याची शक्यता असल्याने खबरदारी घेणे आवश्यक सूचनाही केल्या जातात.

राज्यात कोल्हापूर जिल्हापरिषदेकडूनच हा उपक्रम राबविला जातो. कोल्हापूर जिल्हापरिषदेच्या आरोग्य विभागाने १ हजार २५ ग्रामपंचायतींमधील ३ हजार ४०३ पाण्याच्या स्रोतांची तपासणी केली.

यामध्ये जिल्हा प्रयोगशाळेतून गावातून आणलेल्या पाण्याच्या चाचण्या करतात. यामध्ये ९१६ गावांमधील पाणी स्वच्छ तर १८० गावांमधील पाणी दूषित आढळले आहे.

यातील सर्वाधिक १९ गावे करवीर तालुक्यातील आहेत. तर आजरा, गगनबावडा व शाहूवाडी तालुक्यातील प्रत्येकी एका गावामध्ये दूषित पाणी आढळून आले आहे.