Banana Plantation : उशिराची मृग बहर केळी लागवड सुरू

Jalgaon News : खानदेशात मृग बहरातील उशिराची केळी लागवड सुरू आहे. अर्ली केळी लागवड रावेरात गेल्या महिन्यातच झाली आहे. यंदा केळी लागवड खानदेशात वाढू शकते, अशी स्थिती आहे. केळीचे दर यंदा टिकून होते. फक्त या महिन्यात दर कमीअधिक झाले. त्याचा फटका शेतकऱ्यांना बसत आहे. पण केळीला चांगला पर्याय कृत्रिम जलसाठाधारकांकडे नाही.

यामुळे केळी लागवड कायम आहे. यंदा ती वाढू शकते. लॉकडाऊन असताना यंदा मार्च ते मेच्या मध्यापर्यंत दर्जेदार केळीला चांगला उठाव होता. कांदेबाग केळी व मृग बहर केळीचे उत्पादनही बऱ्यापैकी आले.

जळगाव जिल्ह्यात मृग बहर केळीची काढणी मार्च अखेरीस सुरू झाली. तर कांदेबाग केळीची काढणी दसरा सणापासून सुरू होत असते. सध्या मृग बहर व पिलबाग केळीची काढणी रावेर, नंदुरबारमधील अक्कलकुवा, शहादा, तळोदा भागात सुरू आहे. या केळीला किमान १२० व कमाल १८०० रुपये प्रतिक्विंटलचा दर मिळाला आहे.

मजूरटंचाई कायम

केळी लागवडीसाठी मजुरांची व्यवस्था शेतकऱ्यांना करावी लागत आहे. मजूरटंचाईचा फटका काही भागात बसत आहे. रोपांच्या किंवा उतिसंवर्धित केळी रोपांच्या लागवडीसाठी चांगले नियोजन करून घ्यावे लागते.

यंदा खानदेशात मृग बहरातील केळीची एकूण लागवड ६० ते ६५ हजार हेक्टरवर होऊ शकते. लागवड आणखी २० ते २५ दिवस सुरू राहील, अशी माहिती मिळाली. अनेक शेतकरी आंबेमोहोर, महालक्ष्मी आदी केळी वाणांचा उपयोग केळी लागवडीसाठी करीत आहेत.

अर्ली लागवड अधिक

मृग बहर केळीची लागवड मे महिन्यात सुरू होते. अर्ली लागवड मेच्या दुसऱ्या आठवड्यात केली जाते. तर नियमित लागवड जूनपासून सुरू होते. खानदेशात मृग बहर केळीखालील क्षेत्र अधिक असते. तर कांदेबाग केळीखालील क्षेत्र कमी असते.

कांदेबाग केळीची लागवड जळगाव जिल्ह्यातील चोपडा, जळगाव, पाचोरा, जामनेर भागात केली जाते. तर मृग बहर केळीची लागवड जळगाव जिल्ह्यातील रावेर, यावल, मुक्ताईनगर, जामनेर, नंदुरबारमधील तळोदा, शहादा भागात केली जाते. अलीकडे उशिराची मृग बहर केळी लागवड सुरू आहे.