Pune News : शेतकऱ्यांना कृषी विभागामार्फत निविष्ठांचा पुरवठा करण्यात येतो. गेल्या वर्षी खरीप हंगामात शेतकऱ्यांना उच्चतम गुणवत्तेच्या कृषी निविष्ठा मिळाव्यात, यासाठी कृषी विभागाच्या कृषी निविष्ठा गुणवत्ता नियंत्रण विभागामार्फत जिल्ह्यातील कृषी सेवा विक्री केंद्रांची तपासणी करण्यात आली. त्यात निरीक्षकांनी २१२७ कृषी निविष्ठा नमुन्यांची तपासणी केली आहे, अशी माहिती कृषी विभागाच्या सूत्रांनी दिली.

जिल्ह्यात बियाण्यांचे २१५८, खतांचे २४४० व कीटकनाशकांचे २३८८ विक्रेते आहेत. या विक्रेत्यांमार्फत दरवर्षी शेतकऱ्यांना निविष्ठा पुरविल्या जातात. मात्र शेतकऱ्यांना चांगल्या दर्जाचे खते, बियाणे, कीटकनाशके उपलब्ध व्हावेत, यासाठी कृषी निविष्ठा गुणवत्ता नियंत्रण विभागाकडून तपासणी करण्यात येते. या सर्व विक्रेत्यांकडील निविष्ठा गुणवत्तेबाबत चाचणीसाठी प्रयोगशाळेकडे पाठविल्या. त्यासाठी भरारी पथकांना नमुन्यांचे उद्दिष्ट ठरवून दिले.

गेल्या वर्षी कृषी निविष्ठांच्या नमुने तपासणीसाठी ३८ निरीक्षकांची नेमणूक करण्यात आली होती. त्यांनी बियाण्यांचे १०३७, खतांचे ६२३, तर कीटकनाशकांचे ४६० नमुन्यांचे उद्दिष्ट ठरविण्यात आले होते.

त्यापैकी बियाण्यांचे १०२०, खतांचे ६२८, तर कीटकनाशकांचे ४७९ नमुने घेऊन तपासणी केली. त्यापैकी बियाण्यांचे ४४, खतांचे ५५, कीटकनाशकांचे ११ नमुने अप्रमाणित आढळून आले. तर खरीप, रब्बी हंगामात खतांचे २८, बियाण्यांचे २१ नमुने अप्रमाणित आढळून आले.

विक्रेत्यांवर गुन्हे

दरम्यान, सहा कीटकनाशक विक्रेत्यांचे विक्री परवाने निलंबित करण्यात आले आहेत. अप्रमाणित बियाणे विक्री प्रकरणी १५, खते ११ तर ६ कीटकनाशके विक्रेत्यांवर गुन्हे दाखल केले आहेत. याशिवाय बियाणे विक्रीसाठी १७, खते विक्रीसाठी १४ आणि कीटकनाशके विक्रीप्रकरणी ६ विक्रेत्यांना विक्री बंदचे आदेश देण्यात आले.