Buldana News : जिल्ह्यातून गेलेल्या समृद्धी महामार्गालगत संरक्षक भिंतीला लागून शेतकऱ्यांसाठी सेवा रस्त्यांची (सर्व्हिस रोड) रुंदी कमी करून त्यात झाडे लावण्यासाठी खड्डे खोदण्याचे काम केले जात आहे. याविरुद्ध संतप्त होत शेतकऱ्यांनी हे काम बंद पाडले. शिवाय सर्व्हिस रोडची रुंदी वीस फूट ठेवण्याची त्यांची मागणी उचलून धरली.

शेतरस्त्यांच्या मागणीसाठी महामार्ग संघर्ष समितीला मोठा संघर्ष करावा लागला, तरीही ते काम अपूर्णच आहे. समृद्धी महामार्गाच्या बांधकामासाठी जमीन संपादन करताना शेतकऱ्यांना अनेक आश्वासने देण्यात आली. समृद्धी महामार्ग तयार झाल्यावर मात्र दिलेली आश्वासन पाळण्यासाठी कंत्राटदार आणि रस्ते विकास महामंडळाचे अभियंते चालढकल करीत असल्याचा शेतकऱ्यांचा आरोप आहे.

समृद्धी महामार्ग तयार करण्यासाठी मोठ्या प्रमाणात जुने वृक्ष तोडले. लाखो झाडांचा यात बळी गेला. तेव्हा हरित लवाद, पर्यावरण मंत्रालयाने महामार्ग बांधकाम होण्यापूर्वीची झाडे तोडली म्हणून नव्याने वृक्षलागवड करून समृद्धीच्या दुतर्फा हरित पट्टे तयार करण्याचे बंधन घातल्याचा करारात समावेश आहे. शेतकऱ्यांना संरक्षक भिंतीजवळून मोठा सर्व्हिस रस्ता देण्याचे प्रारंभी मान्य करण्यात आले होते.

मात्र, आता समृद्धीच्या दोन्ही बाजूच्या संरक्षक भिंतीलगत दहा फूट रस्ता ठेवून दुतर्फा वृक्षलागवडीसाठी खड्डे खोदण्याचे काम रस्तेविकास महामंडळाने सुरू केले आहे. शेतकऱ्यांनी हा रस्ता वीस फूट ठेऊन वृक्षलागवड करण्याची मागणी आधीच प्रशासनाकडे केली होती. मात्र, ती पूर्ण न होत असल्यामुळे अंजनी परिसरात सुरू असलेले खड्डे खोदण्याचे काम शेतकऱ्यांनी थांबवले. इतर ठिकाणच्या शेतकऱ्यांनीही असाच पवित्रा घेतला आहे.

अंडरपास व इतर समस्या कायमच

अंडरपास जमिनीत खोल घेतल्याने पाणी साचून शेतकऱ्यांना त्यातून ये जा करण्यास अडचणी येत आहेत. अभियंत्यांनी कबूल करूनही शेतकऱ्यांच्या शेतात पावसाळ्यात साचणारे पाणी जाण्यासाठी नाले बांधून देण्याचे काम प्रलंबितच आहे.

आता मागणी केली तर नाले बांधल्याने संरक्षक भिंत पडेल असे सांगून त्यास नकार दिला जात आहे. पण शेतकरी त्यांच्या मागणीवर ठाम आहेत. समृद्धी महामार्गाने वाहतुकीची सुविधा केली असली तरी त्याखाली असलेल्या शेतकऱ्यांना अनेक समस्यांना सामोरे जावे लागत आहे.