Samrudhhi Accident : ‘समृद्धी’वरील अपघातात निरगुडसरच्या गंगावणे कुटुंबीयातील तिघांचा मृत्यू

Pune News : समृद्धी महामार्गावर झालेल्या भीषण अपघातामध्ये निरगुडसर (ता. आंबेगाव) येथील गंगावणे कुटुंबीयांवर व पंडित जवाहरलाल नेहरू विद्यालयावर शोककळा पसरली आहे. या अपघातात प्राध्यापक कैलास गंगावणे (वय ४८), त्यांची पत्नी कांचन गंगावणे (वय ३८) व मुलगी सई गंगावणे (वय २०) या तिघांचाही या अपघातामध्ये मृत्यू झाला आहे.

नागपूरहून पुण्याच्या दिशेने गंगावणे कुटुंब प्रवासासाठी विदर्भ ट्रॅव्हल्सने निघाले होते. गंगावणे कुटुंबीयांच्या मुलाला नागपूरमधील विधी महाविद्यालयात प्रवेश मिळाला होता. त्याला महाविद्यालयात सोडून हे कुटुंबीय परतीच्या दिशेने निघाले होते, त्याच वेळेस त्यांच्यावर काळाने घाला घातला. कैलास गंगावणे यांचे मूळ गाव शिरूर असून, ते निरगुडसर येथील पंडित जवाहरलाल नेहरू विद्यालयात गेली २७ वर्षे प्राध्यापक म्हणून काम करत होते. या अपघातात विद्यालयावर शोककळा पसरली आहे.

सई गंगावणे ही अतिशय हुशार विद्यार्थिनी होती, तिला तिच्या गुणवत्तेवर आयुर्वेदिक महाविद्यालयामध्ये वैद्यकीय शिक्षणासाठी प्रवेश मिळाला होता व ती वैद्यकीय शिक्षणाची विद्यार्थिनी होती. या तिघांचाही फोन लागत नसल्याची बाब लक्षात आल्यानंतर व बसच्या अपघाताची माहिती मिळाल्यानंतर कैलास गंगावणे यांचे मेव्हणे अमर काळे यांनी शोध सुरू केला.

माजी गृहमंत्री दिलीप वळसे पाटील यांचे स्वीय सहायक रामदास वळसे पाटील यांनी देखील तातडीने हालचाल करून या अपघाताबाबत बुलडाण्याच्या पोलिस अधीक्षकांशी संपर्क साधून तातडीने माहिती घेतली. या अपघाताची बातमी निरगुडसर गावात वाऱ्यासारखी पसरल्यानंतर गाव व विद्यालयावर शोककळा पसरली आहे. शाळेतील अनेकांना अश्रू अनावर झाले.