सांगोला, जि. सोलापूर : सांगोला तालुक्यामध्ये रब्बी पिकाच्या (Rabbi Crop) पेरणीस (Rabi Sowing) सुरवात झाली असुन, यावर्षी तालुक्यात ५६ हजार ६०० हेक्टर क्षेत्रावर पेरणीचे नियोजन करण्यात आले आहे. शेतकऱ्यांनी जमिनीतील पेरणीयोग्य वापसा पाहून व बीजप्रक्रिया करूनच पेरणी करावी, असे आवाहन कृषी विभागाने (Agricultural Department) केले आहे.

सांगोला तालुक्याचे सरासरी रब्बी पेरणीचे ४६ हजार ९५ हेक्टर क्षेत्र आहे. सध्या तालुक्यात अंदाजे २ हजार ५०० हेक्टर क्षेत्रावर पेरणी झाली आहे. तालुक्यात ज्वारी, गहू, मका, हरभरा या प्रमुख पिकांची पेरणी केली जाते.

गतवर्षी रब्बी हंगामामध्ये ४८ हजार ९३२ हेक्टर क्षेत्रावर पेरणी झाली होती. यावर्षी रब्बी हंगामामध्ये ५६ हजार ६०० हेक्टर क्षेत्रावर पेरणीचे नियोजन केले आहे. यामध्ये ज्वारी ४० हजार हेक्टर, मका ८ हजार ५०० हेक्टर, गहू ३ हजार हेक्टर, हरभरा ३ हजार ६०० हेक्टर, करडई २५० हेक्टर,

सूर्यफूल २५० हेक्टर क्षेत्रावर पेरणी अपेक्षित आहे. तालुक्याचे सरासरी पर्जन्यमान ४६८.३ मिमी असून, आतापर्यंत ३२१ मिमी म्हणजे ६८ टक्के पर्जन्यमान झाले आहे. पण जमिनीचा पुरेसा वाफसा पाहून आणि बीजप्रक्रिया करूनच शेतकऱ्यांनी पेरणी करावी,

असे आवाहन कृषी विभागाने केले आहे. कृषी विभागातर्फे रब्बी पिकांच्या पेरणीसाठी सर्व नियोजन करण्यात आले आहे. रब्बी पेरणीसाठी पुरेसे बियाणे व खते बाजारपेठेत उपलब्ध आहेत. तरीही बियाणे, खते व इतर गोष्टींबाबत काही अडचणी आल्यास कृषी विभागाशी संपर्क करावा.

-शिवाजी शिंदे, तालुका कृषी अधिकारी, सांगोला