महाराष्ट्रातील शेतकरी  वादळी वारे आणि अवकाळी पावसामुळे पीक नुकसानीला (Crop Damage) तोंड देत आहेत.  यातच आता पंजाब आणि हरयाणा या प्रमुख गहू उत्पादक (Wheat Producer) राज्यातही वादळी वारे आणि पावसाने थैमान घातले आहे.

गुरुवारी (ता. १६) झालेल्या  पाऊस आणि गारपीटीमुळे पंजाब आणि हरयानातील जिल्ह्यांमध्ये काढणीच्या अवस्थेत असलेले गहू पीक आडवे झाले आहे. यामुळे शेतकऱ्यांच्या हातातोंडाशी आलेला घास हिरावला जाणार आहे.

याचा थेट परिणाम देशातील यंदाच्या गहू उत्पादनावर (Wheat Production) होण्याची शक्यता काही तज्ज्ञांनी वर्तविली आहे.

फेब्रुवारी महिन्यात कमालीचे वाढलेले तापमान आणि आता वादळी वाऱ्यासह गारपीट यामुळे पंजाब आणि हरयाणासह प्रमुख उत्पादक राज्यांमधील गहू उत्पादक शेतकऱ्यांना दुहेरी संकटाला सामोरे जावे लागत आहे.

पंजाब, हरयाणा, चंदीगड, दिल्ली, राजस्थान आणि उत्तर प्रदेशात पुढील काही दिवस मेघगर्जनेसह, विजांच्या कडकडाटासह, वादळी वारे आणि गारपिटीसह मुसळधार पाऊस पडण्याची शक्यता हवामान विभागाने वर्तवली आहे.

गहू काढणीच्या अवस्थेत असल्याने नुकसान जास्त होईल, असे कृषी तज्ज्ञांनी सांगितले. कृषी तज्ज्ञ देविंदर शर्मा म्हणाले की, देशातील वायव्येकडील हवामान पाहता पिकांच मोठ्या प्रमाणात नुकसान होऊ शकतं.

नुकसानीचा अंदाज नंतर घेतला जाणार असला तरी पंजाब आणि हरयाणात वादळी वाऱ्यामुळे काढणीपूर्वीच गव्हाच्या पिकाचे नुकसान झाल्यामुळे शेतकरी आणखी अडचणीत येईल, असे शर्मा यांनी सांगितले. 

दुसऱ्या बाजूला फेब्रुवारी मध्ये वाढलेलं तापमान आणि आताचे ढगाळ हवामान यामुळे पंजाब हरयाना मधील अनेक जिल्ह्यांमध्ये गहू पिकावर तांबेरा रोगाचा शिरकाव झाला आहे.

या रोगामुळे गव्हाच्या वजनात घट होते. या रोगाच्या नियंत्रणासाठी शेतकरी पोटॅशियम क्लोराइड ची फवारणी करतात. त्यामुळे शेतकऱ्यांनी पिकावर फवारणी करु नये.

कारण पावसामुळे त्याचा उपयोग होणार नाही. याशिवाय गव्हाला पाणीही देऊ नये. असा सल्ला चौधरी चरणसिंग हरियाणा कृषी विद्यापीठाचे गहू तज्ज्ञ ओ.पी. बिश्नोई यांनी दिला आहे.