Washim News : सध्याच्या परिस्थितीत शेतकऱ्यांनी कपाशीवरील विविध कीड-रोगांना प्रतिबंध घालण्यासाठी वेळीच एकात्मिक कीड-रोग व अन्नद्रव्य व्यवस्थापन करावे, असा सल्ला कृषी विज्ञान केंद्राच्या तज्ज्ञांनी दिला.

वाशिम जिल्ह्यात कापूस पीक उत्पादन वाढीसाठी पथदर्शक प्रकल्प केव्हीकेचे प्रमुख डॉ. आर. एल. काळे यांच्या मार्गदर्शनाखाली राबविण्यात येत आहे. प्रकल्पाच्या माध्यमातून कृषी विज्ञान केंद्राद्वारे शेतकऱ्यांना वेळोवेळी मार्गदर्शन केले जात आहे. भारत सरकारच्या कृषी व शेतकरी कल्याण मंत्रालय, वस्त्रोद्योग मंत्रालयाच्या साह्याने केंद्रीय कापूस पीक संशोधन संस्था (नागपूर) व कृषी प्रोद्योगिकी अनुप्रयोग अनुसंधान संस्था (पुणे) यांच्या विद्यमाने केव्हीकेमार्फत कापूस पीक एचडीपीएस, सीएस लागवड तंत्रज्ञान : कीड, रोग व अन्नद्रव्य व्यवस्थापन विषयावर शेतकरी प्रशिक्षण, प्रक्षेत्रभेट कार्यक्रम दोनद (ता. कारंजा) येथे आयोजित करण्यात आले.

कार्यक्रमाच्या अध्यक्षस्थानी बाजार समितीचे संचालक देवेंद्र राऊत होते. प्रमुख पाहुणे म्हणून गौरव मानकर व समीर चवरे, संतोष गुल्हाने, ज्ञानेश्‍वर तायडे, कृषी सहायक गजानन राऊत, रामराव डुकरे, ‘केव्हीके’चे पीकसंरक्षण तज्ज्ञ आर. एस. डवरे, कृषी विद्या पीक तज्ज्ञ टी. एस. देशमुख यांची उपस्थिती होती.

गौरव मानकर यांनी विविध शिफारशीत कापूस वाणांची वैशिष्ट्ये सांगितली. टी. एस. देशमुख यांनी कापूस पीक लागवड प्रकल्पांतर्गत शेतकऱ्यांसाठी असलेल्या प्रोत्साहनपर बाबींचे विश्‍लेषण केले. शेतकऱ्यांना कापूस पीक रोपे सघन अतिघनता व कमी अंतर लागवड तंत्राचे फायदे, लागवड क्षेत्राशी अनुकूल असलेल्या संशोधित तंत्रज्ञानाबाबत मार्गदर्शन केले. आर. एस. डवरे यांनी एकात्मिक कीड नियंत्रणासाठी मित्र व शत्रू कीड, पांढरीमाशी- माव्यासाठी पिवळे चिकटसापळे, हिरवी गुलाबी बोंड अळीसाठी कामगंध सापळे वापर आर्थिक नुकसानीच्या पातळी आधारित कीड-रोग व्यवस्थापन करण्याचा सल्ला दिला. कार्यक्रमाचे प्रास्ताविक अक्षय गिरी यांनी केले. सूत्रसंचालन शिवाजी वाघ तसेच आभार आदित्य देशमुख यांनी मानले.