सांगली ः जिल्ह्यात यंदाच्या हंगामातील फळ छाटणीवर (Grape Pruning) परतीच्या पावसाचे संटक ओढावले होते. त्यातूनही द्राक्ष उत्पादक (Grape Farmer) शेतकऱ्यांनी प्रतिकूल परिस्थितीवर मात करत काटेकोर नियोजन करून द्राक्ष उत्पादक शेतकऱ्यांना बागा उत्तमरीत्या फुलवल्या आहेत. सावळज (ता. तासगाव) येथील अंकुश माळी यांनी पेपर आच्छादन केलेल्या बागेतील द्राक्षांची काढणी (Grape Harvesting) सुरू केली आहे. जिल्ह्यातील हंगामास प्रारंभ झाला आहे. यंदाच्या द्राक्षाचा हंगामास जानेवारी महिन्यापासून गती येणार असल्याची शक्यता आहे.

जिल्ह्यात यंदाच्या हंगामातील आगाप फळ छाटणी ऑगस्ट महिन्याच्या दुसऱ्या आठवड्यापासून सुरुवात होते. मात्र गेल्या दोन वर्षांपासून पावसामुळे फळ छाटणी केलेल्या बागांचे नुकसान झाले होते. त्यामुळे आगाप फळ छाटणी करण्यास शेतकरी पुढे आले नसल्याचे चित्र होते. मात्र ज्या शेतकऱ्यांनी द्राक्ष बागेला पेपर आच्छादन केले आहे, त्या शेतकऱ्यांनी जून-जुलै महिन्यात फळछाटणी केली होती.

त्याचे प्रमाण अत्यल्प होते. दरम्यान, जिल्ह्यातील द्राक्ष उत्पादक शेतकऱ्यांनी सप्टेंबर महिन्यात सुरू केली असून, १५ टक्के क्षेत्रावर छाटणी झाली होती. त्यानंतर ऑक्टोबर महिन्यात ७५ टक्के क्षेत्रावर तर १० टक्के नोव्हेंबर महिन्यात शेतकऱ्यांनी फळ छाटणी घेतली आहे.

सप्टेंबर महिन्यात घेतलेल्या फळ छाटणीला परतीच्या पावसाचा फटका बसला. यामुळे घड जिरणे, घड कुज यासह करपा रोगाचा सामना शेतकऱ्यांना करावा लागला. दरम्यान, ज्या शेतकऱ्यांनी बागांना पेपर आच्छादन केले, त्या बागांना या परतीच्या पावसाचा फटका बसला नसल्याने या बागा नुकसानीपासून वाचल्या आहेत.

त्यामुळे या बागेतील द्राक्षांची काढणी सुरू झाली आहे. सध्या द्राक्षाला प्रति पेटीस (चार किलोची पेटी) ३९५ रुपये असा दर मिळत आहे. वास्तविक पाहता, यंदा फळछाटणी उशिरा झाल्याने द्राक्षाचा हंगामास जानेवारी महिन्यापासून गती येईल, अशी शक्यता द्राक्ष उत्पादक शेतकऱ्यांनी व्यक्त केली आहे.

सध्या द्राक्ष बागेला पोषक असे वातावरण आहे. त्यामुळे शेतकऱ्यांच्यात समाधानाचे वातावरण आहे. मात्र सकाळी बागेवर दव पडत असल्याने शेतकऱ्यांची काहीशी चिंता वाढत असली, तरी शेतकरी रोगाचा प्रादुर्भाव होऊ नये यासाठी काळजी घेत आहे. सप्टेंबरमध्ये पावसामुळे नुकसान झाले असल्याने या कालावधीत केलेल्या फळ छाटणीस माल कमी राहण्याचा अंदाज आहे.